MetaCorp a despedi di aña 2017 cu 8 miyon tiro di pagara

ORANJESTAD - MetaCorp a tene su evento di pagara hunto cu su empleadonan, kendenan tur a bini hunto pa asina bisa aña 2017 ayo. Diabierna 29 di December tur empleado hunto cu nan famia a reuni na ATCO Concrete Barcadera unda a disfruta di e cendemento di e tradicional pagara. Robert Carrasquero (COO) y Guus Slabbekoorn (CFO) a cende e pagara pa asina MetaCorp por a bisa 2017 ayo.

Un total 350 pa 400 empleado di 10 compania di MetaCorp a bini hunto pa disfruta di e pagara, asina Lily Krozendijk di MetaCorp a expresa. E empleadonan a bini hunto pa por a bisa ayo na aña 2017. Pa 12’or di merdia a cende e pagara di 8 miyon tiro, cual nan a cuminsa cun’e den cura pasa pafo bay den parkeerplaats y e final tabata hisa cu pumptruck. Despues di tiro di pagara e empleadonan a disfruta di champagne, mientras cu Tipico Macuarima a deleita tur hende cu su Dande.

E ambiente a sigui bou di Metropolis cu tabata toca canticanan varia y hunto cun’e tabatin Grupo di Betico. Tur empleado hunto cu nan famia a pasa un momento ameno, unda cu nan a come y bebe recordando con e aña a bay. Pa MetaCorp e aña 2017 a bay bon y nan ta preparando pa 2018 bay miho. MetaCorp a gradici tur empleado, clientenan pa sostene nan den 2017 y pa nan habri aña 2018 cu hopi animo y positivismo.