Ley riba color di bandera di Aruba a pasa

ORANJESTAD – Cu un total di 13 voto pro y 5 contra, parlamento a vota diamars atardi pa establece un color ‘blauw’ pa e bandera di Aruba, enves di 20 color cu tabata wordo uza antes. E votamento mes a tuma lugar atardi lat, despues cu e reunion a cuminsa for di 10or di mainta. For di awor, e color blauw oficial, pa ley, ta bira e pantone color larkspur 279. “Esey ta e color mas serca di esun original di 1976” presidente di parlamento Marisol Lopez Tromp a bisa NoticiaCla.com diamars despues di votamento.

Loke tabata remarcable segun Lopez, tabata e hecho cu tabatin 3 sprekers ronde. “Esaki no ta usual” Lopez a sigura NoticiaCla.com. Awor cu a mara e color aki den e ley, a crea dos articulo adicional cu ta papia di esun cu ta bay controla pa no tin importacion mas di banderanan cu no tin e color oficial, cual Departamento di Cultura lo ta encarga cune. E di dos articulo lo papia di sancion pa esnan cu importa of bende e banderanan cu no ta e color di esun di nos pais.

Den combersacion cu e presidente di parlamento, e la splica cu minister Otmar Oduber di Cultura, a purba haya consensus den parlamento y a bin cu e comision cu pa añanan a traha riba e proyecto aki. “ Den e proyecto di ley, e la purba incorpora varios sugerencia di statenleden” Lopes a bisa. E la recorda tambe cu pa hopi aña bou diferente gobierno e comisionnan a traha y a yega na nan consehonan.

E dia no a bay sin problema y discusion pues, y partido MEP den oposicion a mustra for di comienso cu esaki lo no tabata bay ta un reunion facil. “ Ni ami, cu a lucha pa nos bandera, cu SEMPER a respeta nos bandera, cu ta lidera e partido cu a bin cu nos bandera, ni ami ta sinti cu mi tin e autorisacion di pueblo pa cambia e color di e bandera” Evelyn Wever Croes a declara riba su pagina di Facebook. “ Anto Otmar Oduber, y partido AVP ta kere cu nan si tin e autoridad ey? AVP no tin autoridad moral pa mishi cu e color di nos bandera!! Pueblo, papia awor!” tabata e declaracion cu e la pone riba su pagina den curso di dia. Pa ora di vota sinembargo, e no tabata presente mas ya cu e la sali rumbo pa Hulanda.