Con pa atende cu bo mascota ora di tiramento di clapchi

ORANJESTAD - Tambe e aña aki Aruba lo ta festivamente celebrando e yegada di e aña nobo , cu un cantidad modera di clapchi. Pa hopi hende e ta un fiesta bunita, pero pa hopi di nos bestianan e porta hopi estresante. Nos sa cu hopi di nos bestianan tin miedo di clapchi. Si bo sa y ta spera bo cacho di tin miedo pa clapchi e ora e guia aki por yuda abo y bo mascota pa hasi e fin di aña aki lo mas agradabel cu ta posibel como pa hende cu pa bestia. Recientemente Aruba Dog Academy a suministra informacion caba riba kico por haci pa trankilisa bo cachonan (y otro mascotanan) den momento di tension di clapchi. Awe ta añadi tipsnan di Animal Care Clinic.

Pakico clapchi ta spanta cachonan (y mayoria otro mascota) ? Pasobra nan oido ta miho desaroya cu esun di un ser humano, cu ta pone cu tur loke e orea di e ser humano scucha, e animal ta scucha 10 biaha mas duro. Como tal, e ta bira mas espantoso pa mayoria. Y ta e forma con e doño di e mascota actua, ta determina con e mascota ta actua.

Entre e tipnan pa bo cacho durante temporada di clapchi, cortesia Aruba Dog Academy

Percura pa a haci hopi ehercicio cu bo cacho(nan), sea e mesun dia of e dia anterior. Esaki por ta caminata largo y structura. Cu structura, nos kier men, lidera e cana, pa asina e cacho tin cu ta enfoca mentalmente y fisicamente. Asina e ta cansa mas lihe y profundo y por ta mas relaha despues ora cu tin clapchi. Sigur riba e anochi di cambio di aña. Tene bo cachonan den cura, y percura pa e cura ta suficiente na ordo y halto of di tal manera cu e cacho no por bula esaki, en caso e spanta di e clapchi. Un cacho den stress por bula muraya hopi halto. Si e muraya no ta hopi halto, murayanan cu tin staca di hero of alto cu ta stroba e cacho di tin un ‘houdvast’, e cacho no ta comfortable pa bula e cura. Depende e situacion di e cas y grandura di bo cas, por pone e cacho paden, cu musica como distraccion y tambe e compania di hende. E cacho ta sinti su mes den compania y ta distrae un forma placentero. Y cerca hende e ta mas trankil. Nunca tira clapchi den cercania di e cacho(nan). No forza nan pa ta cerca tampoco. Nan ta keda traumatiza y no ta bin despues ora cu bo yame (nan). Clapchi NO ta nan miho amigo. Laga nan trankil y lew di clapchi. Si e cacho ta custumbra di ta den un kennel, lague eyden. Hopi cacho ta asocia kennel (crate) cu algo positivo y nan lugar di refugio. Si nan no ta custumbra, no bay pusha nan den e kennel. Nan lo bira mas agresivo y purba haci tur posibel pa sali afo. Nan te hasta por haci nan mes daño e ora. Percura pa bo cacho ta bon identifica. Sea un banchi cu su nomber y telefon di e doño. Of chip bo cacho. E banchi por kibra y perde liher y e ora e identificacion tambe a bay perdi. Laga bo cacho den compania di su coi hunga nan faborito of treat nan cu e ta gusta pasa tempo ariba. Actua NORMAL rond di bo cacho ora di clapchi. Nan ta sigui e patronchi di hendenan cu ta ‘trankil’ y normal. Si bo actua excita, nan tambe ta excita y no ta razona ni controla mas. Ora cu un cacho ta spanta y ta core bin cerca bo, NO caricia (aai) e cacho. E estado den cual e cacho ta (stressed, miedo) no ta e momento pa aai e cacho. Si bo caricia (aai) e cacho e momento ey, bo ta dune e señal cu ta OK pa tin miedo. Haci normal. Actua normal, y e cacho lo compronde cu tur cos ta ok, incluyendo e zonido ‘duro’ di clapchi. Si MESTER, por uza pilder calmante. Veterinarionan ta bende esaki y ta bende a base di e PESO di bo cacho. SA e peso di bo cacho PROME bo bay veterinario. E veterinario lo sa e dosis di duna, a base di e peso. Normalmente e efecto ta drenta den e cacho, mei ora despues. No bay duna bo cacho DIMAS, pa NO overdose e cacho.

Aruba Animal Care Clinic awe ta suministra mas informacion acerca, specificamente riba e parti medicinal.

Medicacion pa aña nobo:

Tin diferente tipo di medicacion disponibel. A base di literatura cientifico nos di Animal Care Clinic a scohe e aña aki pa Diazepam. Esaki ta tambe e medicamento mas receta na Hulanda. Diazepam (Valium) ta un substancia cu un funcion sedante y calmante di angustia. Bo mascota ta sinti soño di medicamento. Esaki ta normal. Diazepam tambe ta causa perdida di memoria: y e bon di esaki ta cu e ta preveni cu bo cacho lo corda di e miedo pa clapchi. Diazepam ta traha lihe. Por cuminsa dune e medicamento e anochi di fin di aña. Duna e dosis corecto di Diazepam minimo un ora antes di e tiramento di clapchi. Por ripiti esaki cada 5 ora si acaso ta necesario. Diazepam ta adecua pa pushi y pa cacho. No hasi uso di Diazepam si bo mascota tin problema renal of hepatico of si e ta na estado y ta na su prome trimester di embarazo! Reduci e dosis si bo cacho bira hopi suf! Percura pa ta presente, pa observa cualkier otro reaccion rapidamente!

Un camisa di presion

Un camisa di presion tin un presion constantemente suave na e curpa y e tin un efecto calmante na mayoria di cacho cu tin ansiedad, miedo of cu ta hopi activo. Bo por compare cu lora un baby cu ta yora. Recompensa su trankilidad cu algo dushi of cu atencion. Asina aki e cacho por siña trata e camisa cu seguridad.

¿Algun pregunta? Pasa bishita clinica Animal Care Clinic of yama na 582-8382. Tambe por yama Aruba Dog Academy na 5880234

Animal Care Clinic y Aruba Dog Academy ta desea abo y bo mascota un prospero aña 2015!