Wever Croes: MEP a vota pro presupuesto supletorio, sin tabata di acuerdo cune

ORANJESTAD – No por ‘label’ Parlamento di Aruba actualmente como un ‘stempelparlement’. Por lo menos no segun prome minister Evelyn Wever Croes, djis pasobra e votamento (fraccionnan di coalicion a vota ‘pro’ e presupuesto supletorio) recien a bay manera cu e ta. Tampoco ta asina cu gobierno di signatura di MEP ta infiltra y impone den e fraccion di MEP. E pregunta a keda presenta den e programa NoticiaCla LIVE riba Facebook di e portal aki, unda cu oposicion ta tildando e fraccionnan di coalicion como tal.

APROBACION

Loke a pasa segun Wever Croes, ta cu parlamento mester a aproba un presupuesto supletorio, cu ta un maneho di gobierno anterior, di cual gran parti di parlamento (incluyendo MEP), no tabata di acuerdo cune. “Pero e mester a wordo trata, sino bo no por yega na fia placa p.e pa paga AZV, cu no a haya placa pa hopi luna” Wever Croes a bisa. E la ilustra e punto aki bisando cu si AZV no a haya placa di gobierno, ta algo hopi serio. “Bo por keda sin paga porta pa e fonteinnan den Caya Betico Croes no traha, pero AZV? Esey ta mustrabo caba con serio e situacion tabata, di likidez, di cash” e prome mandatario a sigui bisa. “Pa bisa e ora ey cu e Parlamento ta un stempel parlement, pasobra nan a pensa riba Aruba, a aproba maneho di gabinete Mike Eman, pasobra nan kier pa Aruba haya e placa cu e mester haya, cu ta algo sobre humano. Mi ta duda cu bo por cataloga esey como stempel parlement.” Wever a sigui bisa.

GARANTIA

E pregunta crucial, tabata si tin garantia cu e parlamento (specialmente esnan di gobierno), no por y lo bira y of actua como un stempel parlement. Y cu si tin metemento di gobierno pa cu e fraccion di MEP, pa sigura cu e ta bay na ‘amen’ di gobierno na mando. Segun Wever Croes, e scenario nan presenta, no a pasa den e prome 5 simannan cu e parlamento a sinta, pasobra ‘cosnan no ta bay asina’. “Fraccion (di MEP) tabatin hopi pregunta riba e presupuesto supletorio. Nan (di MEP) no tabata happy cune, y nan a bisa esey tambe durante e tratamento” Wever a sigui bisa. Aki e ta recorda entre otro parlamentario Daphne Lejuez durante su stem motivering, cu el a bisa cu e ta bay di acuerdo cu e ley pasobra Aruba mester di e placa. Pero mi no ta duna mi aprobacion na e maneho” e prome mandatario a bisa. El a recorda otro parlamentarionan manera Endy Croes cu tambe a bisa mescos. Pues no ta sin mas nan a aproba e presupuesto menciona.

MODUS OPERANDI

Segun Wever Croes, e tin contacto si cu parlamento, cu si tin cualkier cos cu mester wordo trata, ta hacie adelanta den reunion di comision caminda tanto oposicion como representante di coalicion tey. “Ora cu bo sinti cu un ley ta wordo carga, bo ta mande pa Parlamento. Si tin un ley cu no ta wordo carga, anto bo tin cu haci adaptacion na dje” Wever Croes a bisa. A sigura cu e fraccion di MEP tin e libertad di protesta, y bay contra. NoticiaCla a recorda e prome mandatario di e situacion cu a surgi algun aña pasa ora cu dos parlamentario di e fraccion a vota contra, y nan a wordo saca di partido. Segun Wever Croes, esaki ta algo otro. “E issue di e dos miembronan di MEP cu a vota diferente no ta pasobra nan a vota contra loke MEP tabata kier. Nos como team a palabra cu nos ta bay un direccion. Nan tambe, y ora di e votacion nan a bay. Esey a crea hopi friccion. Bo tin e libertad pa vota otro, pero ora bo ta hunga futbol y ta un team, anto bo ta kere cu tur hende ta bay e direccion ey pa hinca e goal y e otro ta bay dicidi cu ta bay hinca un auto goal, bo ta kere cu nan ta carg’ue y ta contento?” Wever a compara. “No, pasobra e strategia ta cu bo ta bay tal direccion. E no ta un strategia impone. E ta un strategia cu ta palabra. Pero nan a bay otro direccion” e prome mandatario a bisa. Segun Wever Croes, ta hopi importante pa tur (parlamentario) por trece nan punto dilanti. “Y ami a bisa nan na diferente ocacion, cu nan tin e poder pa mantene e gobierno na mando. Pasobra nos ta un coalicion cu ta nifica cu un ta controla otro, y tanten cu Parlamento tin confianza den nos, nos ta sinta eynan. Dia cu e parlamentarionan no tin confianza den nos, y nos tin parlamentarionan hopi skerpi cu no ta sconde nan opinion manera Ricardo Croes y tambe di MEP, y no kere cu bo ta kere cu bo por yega impone e direccion pa bay” Wever Croes a bisa.