Cera frontera comercial cu Venezuela por afecta Aruba severamente

ORANJESTAD –Si presidente di Venezuela Nicolas Maduro actua riba su menaza di cera frontera comercial cu Aruba, ‘e por afecta nos severamente’, segun prome minister di Aruba Evelyn Wever Croes den e programa NoticiaCla LIVE diahuebs. E la desmenti si e audio cu ta circula cu ta bisa cu pa 1 di januari proximo lo cera frontera cu Venezuela. E mandatario a sigura cu el a tuma accion riba e caso di menaza di presidente di Venezuela pa cera frontera, aunke Aruba riba su mes no por actua riba e tema. “Desde e prome reaccion, e liña di comunicacion tabata pa expresa nos preocupacion pa cu mensahe asina” Wever Croes a sigui bisa.

EMBARGO

E prome mensahe di e presidente, segun Wever Croes, tabata cu lo a impone un embargo, pero un siman despues a papia di cera frontera. “E ta trece hopi desafio cune” e mandatario a sigui bisa. Via directie buitenlandse betrekking, a tuma contacto cu consul di Venezuela, cu a splica DBB den liñanan general cu e preocupacion di Maduro tabata cu tin hopi contrabanda tumando lugar entre Aruba y Venezuela. Y e kier para esey” Wever Croes a bisa. Cu kier para e contrabanda, tambe ta un tema cu tin Aruba preocupa. Tin contrabanda di droga, arma y te hasta hende segun Wever Croes. E ta un tema cu tin preocupacion di gobierno, los di e declaracion di presidente Maduro. “Despues tabatin un audio cu ta circula cu nan lo bay cera frontera 1 di januari, pero nos a haya confirmacion cu esey tabata falso (fake news). Aruba ta mas trankil awor riba e tema, y ta wordo informa via DBB y ta keda monitoria e situacion. “Nacionalmente nos a dicidi cu nos tin cu bay atende e tema aki si di nos frontera y e contrabanda cu ta tuma lugar.

ARUBA Y PANAMA

E noticia cu (noticiacla a publica tambe) Aruba ta forma 4% di e contrabanda cu ta drenta Venezuela, ta algo nobo pa prome minister. "Esey ta un noticia pami sorprendente, pasobra nos sa cu tin contrabanda, pero di e otro banda. No cu anos, via Aruba ta smokkel y hiba cosnan Venezuela.