Ruiz: No ta intencion pa aumenta BBO/BAZV pa awor

ORANJESTAD – No ta intencion pa aumenta tarifa di BBO/BAZV. Por lo menos no pa awor segun minister di Finanza Xiomara Ruiz Maduro a bisa den e program NoticiaCLA LIVE diaranson atardi. E aña 2018 ta bira un aña di transision pa loke ta e situacion financiero di pais Aruba, cu miras cu na 2019 por implementa un reforma fiscal desea.   “Nos ta contemplando kico nos ta haci” Ruiz a bisa. Mientras cu no kier papia di aumenta impuesto, ta papia den direccion di cambia e tipo di impuesto (mas sigur impuesto indirecto) pero no sa ainda kico exacto.

BBO/BAZV

No ta intencion pa hisa BBO/AZV segun Ruiz. “Si ta asina cu nos ta contemplando e parti di reforma, y eynan nos ta wak si sea BBO ta keda manera cu e ta of si ta transforma esaki den un otro tipo di belasting, cu ta crea un otro tipo di eficiencia” Ruiz a sigui bisa. No por haci esaki den 2018 mirando cu ta laat pa esaki.

ABB

Cu ki reforma cu gobierno bin cune, tin algun cambio cu mester custumbra na dje. Den caso di ABB, cu ta algo cu tabata riba mesa durante gabinete Mike Eman II (pero cu no a sigui pa motibo di su impopularidad politico), e ta algo cu por usa, aunke lo mester finetune esaki. No tin nada specifico na mente aworaki cu gobierno kier introduci. “Aworaki nos sa cu e lo ta algo di belasting indirecto” Ruiz a bisa. Lo analisa e tipo di impuesto cu tin aworaki, y wak con por cambia nan pa otro tipo di impuesto. “Sea ta elimina cierto tipo di belasting, ta hinca uno cu ta bira un base mas ‘algemeen’ cu ta bira mas eficiente cu gobierno por haya su placa. Esey ta loke ‘as we speak’ nos ta trahando riba dje, pa wak kico ta e scenario cu nos por uza pa e cambionan cu por bin cune. ABB ta uno cu ta hinca eyden pero no tin un bon decision riba dje ainda” Ruiz a finaliza bisando.