Ruiz: Lo actua mas severo contra companianan mal pagado di BBO

ORANJESTAD – Un grupo di comercio cu ta ‘mal pagado’ ta pone cu nos ta cay atras cu entrada na BBO/BAZV. Algo cu e colegio di supervision fianceiro di Aruba CAFT tambe ta bisa constantemente, y cu recientemente departamento di impuesto tambe a confirma. E mandatario di finanza Xiomara Ruiz Maduro a sugeri den e programa NoticiaCla LIVE riba Facebook diaranson atardi, cu ta bay actua mas duro contra e grupo di mal pagado aki. Segun Ruiz, tin tambe e hecho cu gobierno anterior tabata manipula cu cifra, y pone cifra mas halto cu realmente gobierno mester haya na BBO/BAZV, cu ta pone cu logicamente e cantidad presupuesta, no ta drenta. Awor cu Ruiz mes ta mandatario di Finanza, e tin e pruebanan cu por mustra esaki.

MALPAGADO

Segun Ruiz, tin companianan cu no ta cumpliendo cu nan deber di pago. “Tin hopi compania p.e. cu ta paga nan belasting corectamente, y ta carga bo economia y ta duna di nan parti” Ruiz a bisa. Pero mester por cu esnan cu ta cumpliendo, tambe haya loke ta toca nan, manera restitucion. Ruiz a confirma cu enberdad manera cu e portal aki a raporta caba, pa otro aña gobierno lo ta ‘bij’ cu e pago di restitutie. Pero mes momento el a mustra riba esnan cu no ta contribui, y ta traha di manera illegal. Riba esaki a puntra e mandatario con por haci pa logra pa esnan cu no paga, cumpli cu nan deber pa e ‘compliance’ di BBO drecha. Companianan cumplido ta duna feedback na gobierno cu ta bisa cu tin hopi competencia cu no ta bon. “Abo tin tur cos legal y otro ta hacie di un forma illegal, nan ta sigur cu no ta draag af belasting, pero nada no ta pasa cu nan. Kier men belastingdienst no ta mishi cu nan” Ruiz a sigui bisa. “Eynan ta unda cu nos tin cu bay crea un miho balansa. Bo no por spera un compliance di esnan cu semper ta aporta, anto ta cera wowo of no haci un trabou cu esnan cu tambe ta riba mercado pero cu no ta aportando” Ruiz a bisa. “Pa esnan cu no ta pagando, pa nan tambe bay aporta” Ruiz a bisa, aunke e no kier a bisa specificamente kico exacto lo haci y con lo bay actua contra esnan ‘mal pagado’.