Ruiz: No ta haya aanwijzing pa entrega presupuesto laat

ORANJESTAD – Aruba no mester preocupa pa haya un aanwijzing di Hulanda pasobra gobierno di Aruba no a entrega presupuesto na tempo. Asina minister di Finanza Xiomara Ruiz Maduro a bisa diaranson atardi den e programa NoticiaCla LIVE riba Facebook. E hecho cu e mandatario tabata ‘proactivo’ y tuma contacto cu CAFT prome caba, a splica nan e situacion y eynan a bin compronde cu Aruba ta ‘scapa’ di un aanwijzing, mirando cu ta cumpliendo cu cierto rekisito y cu no tin necesidad pa conseha (contrario cu a haci cu St Maarten siman pasa) gobierno di Reino pa duna Aruba un aanwijzing.

SITUACION

Ruiz a splica cu a topa cu CAFT caba y splica e situacion y cu no ta bay entrega e presupuesto na tempo. Basa riba e sistematica di e ley di supervision, a splica e secretario y tambe te hasta prome minister Hulandes Mark Rutte, creando e espacio necesario cu e splicacion necesario. Manera e ley LAFT ta stipula, mester tin sea un presupuesto cla pa e proximo aña, prome cu 15 di december entrega, of un bista riba dje. Como tal Ruiz a splica cu a duna CAFT cu tin un bista riba e presupuesto. A base di e splicacion, nan a manda informa Rijksministerraad cu mirando loke cu Aruba a haci, no mester di un aanwijzing pa Aruba. “Si a menciona cu tin un situacion financiero precario” Ruiz a bisa.

DEADLINE

Mientras cu Aruba no a keda cla na tempo, ta bin e pregunta ki tempo lo por entrega un presupuesto 2018. Aki Ruiz a mustra cu pa gobernacion di pais Aruba, si no tin un presupuesto di e aña, por uza ¼ parti di e presupuesto anterior, pendiente e presupuesto nobo. “Prome cu 30 di April Aruba mester por tin un presupuesto na e momentonan n ey” Ruiz a bisa.