Polis maritimo ta rescata boto cu tres Venezolano

ARASHI – Polis awe a raporta un caso cu nan ta considera straño, cu a sosode riba laman. Tabata dia 22 december mas o menos 9’or di mainta cu polis maritimo a haña un melding di un dive boat local cu e la spot un boto straño registration venezolano cu 3 persona na bordo ongeveer 1 miya pabao di Arashi. Nan tabata hasi signal cu nan man direction di e dive boat. E polis maritimo a bay na e sitio y berdad a haña un boto di mas of menos 27 pia cu registration Venezolano AMMT-1696 y cu ta hiba e nomber "Polaris" cu 3 persona Venezolano. Polis maritimo a constata cu e persona nan aki tabata den un situation poco fastioso. Nan a declara cu nan tin mas di 1 dia sin come. Nan a declara cu nan a sali dia 21 di december   atardi for di Punto Fijo pa hiba e boto Puerto Cabello, Venezuela. A bira scur na caminda y nan a navega direction noord. Nan punto di referencia tabata e lighthouse di Punta Macoya. Door cu no tabata tin coriente na Venezuela, e lighthouse no tabata traha. Nan a sigui bin noord. Nan a pasa e tanker nan entre Aruba cu Venezuela. E momento ey nan a waak un luz di faro leu. Nan a kere esey ta nan punto di referencia y a sigui navega direction e luz. Nan a navega full anochi ora mainta a habri nan a waak tera pero nan no tabata sa unda nan ta. E momento ey e boto a haña problema pa falta di gear oil. Nan a tira anker y warda ayudo. Polis a bin cu nan waf di playa pa hasi tur control y duna nan e ayudo necesario. Polis maritimo a duna nan cuminda y gear oil pa e boto. Personal di imigracion a scan tur documento y a resulta cu enberdad ni e boto ni e 3 hende nan nunca a bin Aruba. Imigracion a klaar nan in. Polis maritimo a compaña nan pa waf di Barcadera y pa e mesun dia esta dia 22 di december pa 3 pm despues di regla tur nan documento nan y e boto nan a sigui nan caminda pa Venezuela. Ta trata di:

M.J. RUIZ VEGAS

D.O.VEGAS FALCONI

J.A.BENTREDAL