Un kwart di un container importa, tabata cu clapchi bieu

ORANJESTAD – Un cargacion di kwart di container di clapchi tabata consisti material bieu, fecha venci. Experto di DOW riba explosivos, Rubin Ponson a confirma cu por lo menos un quart di un container completo tabata consisti di clapchi bieu. “Tambe den resto di container tabatin clapchi cu fecha di 2016 cu ta wordo considera como clapchi bieu. Pa nos e clapchi aki ta bieu pasobra e no mag di sobra. Si e sobra, otro aña e no por wordo bendi mas”, Ponson a sigui bisa.

FABRICA

Segun Ponson, ta algo a bay robez cu a pone cu un fabrica di China a manda e cargacion bieu, envez di cos ‘nobo’. “Esaki e comerciante aki mes a mira e situacion y lo bay haci su trabou pa mira con e por haci e compania responsabel pa esey” Ponson a bisa. Pues no ta culpa di e comerciante, sino esun di e fabrica di cual e la importa e clapchi. Por lo menos, Ponson no ta kere cu e comerciante a haci esaki ‘intencionalmente’. “Ora cu bo manda busca un producto, bo kier pa e ta esun mas nobo cu tin” Ponson a sigui bisa.

CONTROL

Prome cu cargacion di clapchi por a keda distribui e aña aki, mester a repasa tur esaki pa mira si e clapchinan tabata cuadra cu regla y pedido. “Normalmente nos ta wak na momento cu douane habri e containernan, y ta wak si en caso tin clapchi cu nos ta duda (ariba)” Rubin Ponson, experto pa DOW riba explosivo, a bisa NoticiaCla diaranson mainta. Entre otro ta controla pa largura di mecha, of clapchi cu ta desconoci pa Aruba. Riba nan ta haci test. Pero den e caso aki ainda no a topa ningun clapchi cu ta desconoci. Tambe loke a yuda hopi ta cu cos a bay miho debi na bon planificacion. A reuni tempran cu tur e stakeholders. E presion a wordo poni pa e compania cu ta percura pa e transporte, y a tende cu a hala e fecha di transporte pa un siman prome, cu a pone cu asina por a keda cla mas liher (5 dia extra) di control, pa por a traha riba nan. “E tabata suficiente pa por a keda cla na tempo prome cu dia 22 di december” Ponson a bisa.