Distribucion di 30 container di clapchi awe marduga a bay bon

ORANJESTAD – E distribucion di clapchi awe marduga a bay hopi bon. Asina e experto di DOW riba tereno di explosivo, Rubin Ponson a confirma pa NoticiaCla diaranson mainta. Ponson a splica cu contrario na añanan anterior, a cuminsa e proceso for di 1’or di awe marduga, cu a pone cu pa ora cu solo a sali, tur cos tabata cla caba. Tin menos clapchi importa, pero mes momento Ponson ta sigura cu tin suficiente clapchi pa tur hende. Y den curso di dia awe, ya e rebendedornan por cuminsa bende nan cargacion. Na tur, esnan envolvi a distribui 30 container di clapchi.

DISTRIBUCION

“Prome biaha nos a cuminsa e horario aki pa wak si nos ta caba prome cu solo sali ainda, y pa evita e trafico riba caminda, y pa e trabou bay mas lihe. Y esey a sosode tambe” Ponson a bisa. Ya pa mainta, practicamente tur container di clapchi tabata pafor di e deposito di Wela. Awor e clapchinan a bay na e lugarnan di benta mes, y un parti di nan a bay pa esnan cu ta haci e benta ‘por mayor’.

CONTROL

E control riba e lugarnan di benta di clapchi ta cuminsa for di awe caba, no obstante e hecho cu no tur lugar a ricibi nan cargacion ainda, of a keda cla pa nan habri nan lugar di bende clapchi. “Depende di e departamento cu por manda nan hende riba caya awe caba” Ponson a bisa. E ta admiti si cu enberdad varios lugar ainda lo ta preparando pa habri, y no por keda cla awe sino te cu mayan. “Awe sigur si lo tin e control riba e parti di e benta por mayor caminda nan ta riba veld, repartiendo e clapchinan ainda” Ponson a sigui bisa.