Gomez: Otro aña dept di impuesto ta ‘bij’ cu pago di restitutie

ORANJESTAD – Intencion ta pa otro aña ora cu un cliente cu entrega su aangifte di inkomstenbelasting, haya su restitutie mesora. Asina directora di impuesto Luenne Gomez Pieters a sigura NoticiaCla recientemente. Segun e directora, por haci esaki mirando cu den dos aña danki na trabou duro di su team, a logra ‘haal in’ e retraso di restitutie, cu ta pone cu e plan ta pa ta up to date na 2018. Cu esaki, Gomez ta kita e mito, cu ta algo normal cu pago di restitutie ta dura añanan largo despues cu abo si cumpli netchi cu bo aangifte.

CRITICA

Gomez a mustra cu for di tempo cu e la bin na cabez di e departamento na 2015, e ta tende e critica cu ta blo pidi pa clientenan paga tur sorto di impuesto, pero e mesun departamento di otro banda no por cumpli cu e pago di restitutie si na tempo. Gomez ta considera e critica uno valido, y a dicidi cu tin cu pone un fin na e mito ey. A traha hopi duro cu tur departamento, cu ta pone cu pa otro aña, por haya e restitutie cu ta coresponde e cliente ora cu e cumpli cu su pagonan regular.

ATRASO

Actualmente segun Gomez, tin un retraso ainda aunke no grandi. Ta cerando e aña fiscal 2017, mientras cu ta terminando aña 2013 pa paga restitutie. A cuminsa tambe cu e IB regeling 2014 (inkomstenbelasting), den un montante no grandi ainda. Esun di 2013 ta casi cla cu tur e aangifte verwerking pa despues cuminsa cu e ‘masale verwerking 2014’. “Pa otro aña ta premira pa cuminsa cu 2015 banda di februari of maart 2018. Y e ora ta keda ainda 2016, pa procesa. 2016 ainda su deadline no a pasa (esey ta vence 2 april 2018). Pero pa otro aña nos tine como target pa ta helemaal bij. Esey kier men cu e aña cu e cliente ta entrega su aangifte IB, e ta haya su restitutie tambe” Gomez a sigura e portal aki.