Aproximamente 5.000 plachi di number pa 2018 paga caba

ORANJESTAD – Clientenan a cuminsa paga nan impuesto di vehiculo di motor trempan, pues ta haciendo uso di e posibilidad brinda pa departamento di impuesto. Asina e directora di e departamento Luenne Gomez Pieters a confirma pa NoticiaCla diabierna mainta. Esaki a cuminsa for di November caba unda cu clientenan por a paga esaki prome cu fin di aña, evitando rij nan largo ora cu aña habri y frustracion innecesario.

CANTIDAD

Tin casi 4.800 cliente a paga e nan impuesto caba pa 2018, di cual mayoria a paga full aña. E motibo principal ta cu hendenan aki no kier para den rij dos biaha, (paga den dos paga) sino ‘kita cos foi man’. Si compara e cifra cu aña pasa, tin un adelanto den entrada pa loke ta vehiculo di motor. “Nos clientenan di berdad ta cana den compas ora cu ta trata e pagonan cu mester wordo haci segun termino di ley” Gomez a sigui bisa.

WEBSITE

Den futuro kier brinda clientenan pa riba website mira e waiting time cu tin ora cu trek number pa pago. Via website y despues un app, clientenan por mira si ta hopi druk na oficina principal, pa nan bay paga na un MFA of otro lugar. Esaki ta planea pa 2018 segun e directora. E website ta e prome fase, unda cu lo brinda e servicio extra, pa evita cu e cliente no tin cu confronta rij largo ora cu e yega, sino por sa esaki delanta caba.

AREGLO

Pa e truckdrivernan cu no ta A plachi, a cumbini cu e maneho cu tabatin aña pasa, lo por paga den 2 pago, mirando cu nan a vocifera nan preocupacion ora cu tin un truckdriver cu tin mas cu un truck, y e suma di impuesto ta bira mucho pisa pa pago den un solo biaha. E oportunidad ta wordo brinda pa paga esaki den januari y tambe na juni.

PAGO 2017

Pa loke ta e clientenan cu no a paga nan impuesto pa nan vehiculo di motor pa e aña ainda, tin 12% cu falta pa paga di e 74.000 mil plachi di tur combinacion posibel. Di e A plachi tin 12% cu no a paga nada at all. A manda durante e aña varios carta di no pago, informando cu si no paga, nan por haya nan den problema. Si e pago di 2017 no a cumpli, por tin chens cu nan haya multa pa esaki. E grupo cu ta ‘mal pagado’ ta un poco mas chikito cu aña anterior cu sigur ta algo positivo.