“Sun outage’ lo interferi den señal di Cable TV

ORANJESTAD - Lo tin interferencia den servicio di cable debi na e “Sun Outage” entre dianan 26 pa 30 di September proximo. E “sun outage” ta interumpi e servicio di cable normalmente 2 bes pa aña. Durante e luna di maart e prome “sun outage” a sosode y den luna di september e di dos “sun outage” ta sosode e aña aki. Loke ta pasa ta cu e solo ta posiciona directamente tras di satellietnan di comunicacion cu ta transmiti señalnan pa stacionnan riba tera. E rayonan di solo ta interferi cu e señalnan entre e satellite y e “earth station”. Un asina yama “sun outage” ta pasa na momento cu e “earth station” no por distingui e energia di e solo cu e señal di comunicacion.

EFECTONAN NOTABLE DEBI NA E PROBLEMA AKI:

— pantaya lo daña y lo mira pixels, un screen preto  of e señal di  "One Moment Please" riba e   screen. Kizas te hasta por perde algun canal pa algun momento. Desafortunadamente, no tin nada cu por haci pa preveni e rayonan fuerte di e solo pa interfere den nos programacion di television.

Algun canal tin e impacto den oranan di mainta y algun lo experencia esaki mas laat atardi, pero den mayoria caso e canal lo tin e interferencia pa duracion di 20 pa 30 minuut pa dia.