Na 2018 pagonan online di impuesto no mester tin mas problema

ORANJESTAD – Mientras cu departamento di impuesto e aña aki tabata motiva clientenan pa paga nan impuestonan ‘online’, esaki no a resulta mes positivo, debi na problemanan cu a bin encontra. Clientenan tabata keha cu e pagonan no tabata bay ‘direct’ y tabatin otro problemanan cu a pone cu e facilidad a bira mas un dolor di cabez cu un solucion. Directora di impuesto Luenne Gomez a confirma e problema, y a purba soluciona esaki. “Nos a tende e critica di e clientenan y a acerca e 5 banconan” Gomez a bisa, pa soluciona e problemanan cu tabatin.

SOLUCION

Despues cu e departamento a confronta banconan cu e problema, banconan a presenta un solucion den forma di un ‘front face’ esta un imagen frontal cu ta mas apto y servicial y practico pa e cliente uza. Esaki ta encera cu e cliente por scoge di diferente impuesto pa paga cu e departamento ta cobra. “E suma por wordo yena, y e periodo, persoonsnummer y e betalings kenmerk cu ta duna nos e posibilidad e ora pa reconcilia den un manera hopi mas facil y lihe” Gomez a sigui bisa. Depende di e departamento, ta load e informacion den e sistema automaticamente tambe, cu ta pone cu e sistema ta bira mucho mas liher, cu ta pone cu e cliente ta haya su sticker mucho mas liher. Den futuro un pago di banco, e cliente tambe ta ricibi su comprobante, (recibo) pa evita double pago. Algo cu no por ainda ora cu e cliente kier paga online.