Lila Henriquez: Famia Mitch Henriquez den shock cu sentencia

DEN HAAG – E famia di e Arubiano Mitch Henriquez cu a fayece na Hulanda na 2015 despues di un disputa cu polis, ta den shock ainda. Esey despues di a tuma nota di e sentencia awe mainta cu dos polis Hulandes a haya relaciona cu e caso. “Manera bo por imagina nos un biaha mas a keda completamente sorprendí di e uitspraak di huez” Lila Henriquez, e ruman di Mitch a bisa NoticiaCla diahuebs atardi. “Nan ta culpabel di maltrato cu consecuencia e morto di Michel. Huez ta bisa cu nan straf ta 6 Luna di strafcel voorwaardelijk? Nos a keda spraakloos” Henriquez a sigui bisa. E dos polisnan a haya castigo condicional di 6 luna prison, pero por continua cu nan trabou como polis. “Eigenlijk nos ta den shock ainda cu e vonnis aki”.

REACCION

Segun Henriquez, ta incomprendible cu e polisnan a wordo haya culpabel pa su morto pero nan no ta haya castigo. “Nos ta sumamente desapunta den e uitspraak aki. Con 6 luna voorwaardelijk straf ta hustifica morto di nos ser keri?” e ruman a sigui bisa. Loke mas ta stroba nan, ta cu e polisnan tabata anonimo te cu awe. “Nan a keda cu nan salaris, awo nan ta culpabel y nan ta keda cu nan trabou? Anos ainda no por bin bij di e cos ki. Seguramente esaki ta e soño di tur criminal pa niun hende no sa ken e ta y pa no sinta castigo tampoco. Echt nos no ta compronde” Henriquez a sigui bisa. E famia no por caba compronde con e dos polisnan por sigui traha y ki mensahe esaki ta manda pa comunidad. “Of dos aña y mei na cas cu pago, anonimo y garantia di trabou ta hustifica morto di nos ser keri?” e ruman a finaliza bisando.