Wever: A pidi consul Venezolano aclara declaracion di presidente Maduro

ORANJESTAD – Aruba kier aclaracion di e declaracionnan recien di presidente di Venezuela Nicolas Maduro. Manera ta conoci e siman aki di sorpresa durante un programa televisa, Maduro diripiente a manda mensahe cu e (taba) tin intencion di cera e via di comunicacion comercial entre Venezuela y Aruba (y Bonaire y Corsou), y otro paisnan bisiña, debi cu e ta sospecha cu ta usando esaki pa trafica mercancia di contrabanda for di e pais. “Mi a manda pidi Consul di Venezuela pa aclarea e declaracionnan di presidente Maduro” prome minister Evelyn Wever Croes a bisa NoticiaCla diahuebs atardi. E peticion lo bay via directie Buitenlandse Betrekkingen. “ Y nos lo sigui monitorea e situacion” Wever Croes a sigui bisa e portal aki.

REACCION

Asina cu e presidente Venezolano a haci e declaracionnan menciona, NoticiaCla tabata e prome pa haya reaccion di e prome mandatario di Aruba riba e tema. Aki Wever Croes a bisa diaranson mainta cu Gobierno di Aruba tabata preocupa cu e expresionnan haci di presidente Nicolas Maduro riba e relacionnan entre Aruba y Venezuela. . “ En bista cu relacionnan exterior ta asuntonan di Reino mesora nos a tuma contacto cu gobierno Hulandes y di Reino, y ta monitoreando e seriedad di e situacion, pa evita consecuencianan negativo pa nos comunidad” Wever Croes a sigui bisa. Ademas e prome mandatario a mustra cu “mester remarca cu e topico di mercancia di contrabando ta un tema serio cu nos ta atendiendo tambe cu hopi interes. “Contrabando di mercancia entre Aruba y Venezuela mester wordo atendi cu man duro” Wever Croes a finaliza bisando diaranson .

E MENASA

Manera NoticiaCla a raporta anteriormente, presidente Venezolano Nicolas Maduro diamars anochi a menaza di cera e via di comunicacion entre Venezuela y islanan ABC. Esaki debi cu segun Maduro, tin mucho ‘mafiamento’ tumando lugar di producto entre e pais Venezolano y e islanan ABC. “Ami a pensa pa sera tur via di comunicacion di comercializacion di tur tipo, aero y maritimo cu Aruba, Corsou y Bonaire na cualkier momento” Maduro a bisa. “Mi a pense seriamente. Pa e mafia. Nan ta hiba tur cos, tire, zeta, shampoo, cuminda, tur cos “. E declaracion ey a keda televisa diamars anochi y a bira topico di combersacion awe mainta.