Corte: Thijsen a tuma un decision basa riba un autoridad cu e no tin

ORANJESTAD – Huez a dicta fayo awe contra gobierno (lesa Parlamento di Aruba) y duna periodista Nelson Speed Andrade su caso sumario gana. Den un veredicto di 8 pagina, huez a splica e motivacion di e sentencia, unda cu ta resalta cu e presidente di Parlamento Ady Thijsen, a uza un poder cu e no tabatin, basa riba un emocion, cu corte no por comparti. Como tal a ordena pa e periodista haya entrada bek na edificio di Parlamento dentro di 24 ora cu e veredicto keda presenta. Mientras cu tin posibilidad pa apela e sentencia, e veredicto mester keda ehecuta mesora, aunke cu a opta pa no impone un multa si no cumpli cu esaki.

E CASO

E meta principal di e caso, ta e decision pa saca un persona for di e edificio y e base cu e persona (Thijsen) a usa pa tuma tal decision. Den esaki segun huez, Thijsen no a hustifica e motibo suficiente den su defensa, pa por carga e decision. A mustra cu basa riba e reglanan cu tin den Parlamento, e autoridad di Thijsen pa actua den cierto cos, ta limita. Ademas huez a mustra cu Thijsen no tin e autoridad pa tene un persona for di Parlamento pa duracion largo. “E ta bruha su autoridad di pone regla y duna sancion” e huez a sigui bisa.

MENASA

Durante e caso, Thijsen a bisa huez cu tabata e gritonan di e periodista durante un noticiero na radio tabata e motibo pa e sanciona e periodista y prohibie entrada. Ademas, Thijsen ayera a bisa huez cu el a sintie menasa cu e gritonan di e periodista. Na dado momento durante e caso (manera NoticiaCla a raporta caba) huez a cuestiona si Thijsen enberdad ta considera e gritonan como menaza. Den e sentencia, huez ta bolbe riba e punto aki y ta ripiti esaki pero ta mustra ademas cu (no desviando di su pregunta den corte) e loke cu Thijsen a considera menaza, corte no ta di acuerdo cune. A mustra cu un politico mester por contra gritonan asina, y cu no semper e politico lo por ta di acuerdo, pero e periodista por (aunke no ta na gusto di e politico) haci su gritonan cu no tur ora lo ta na gusto di tur hende. Loke mas huez a cuestiona y a haya preocupante, ta cu Thijsen a uza su funcion di presidente di Parlamento, pa sanciona un periodista cu a manda un critica personal riba e persona. “(Thijsen) a tuma un decision riba un autoridad cu e no tin”, huez a sigui bisa. Lesa e veredicto AKI.