Departamento di Impuesto lo bishita algun sitio di benta di clapchi

ORANJESTAD – Departamento di Impuesto ta informa cu entrante 28 di december proximo lo bay bishita algun sitio di benta di clapchi. Esaki ta un bishita di trabou, unda e enfoke lo ta pa aumenta e cumplimento pa cu e debernan di belasting. Durante e bishita, e funcionarionan di Departamento di Impuesto lo haci e comerciante algun pregunta relaciona cu su negoshi di clapchi. Alaves nan lo duna e comerciante splicacion y conseho encuanto e administracion di e compra y benta di clapchi. Manera ta conoci, e administracion di un empresa ta sumamente importante pa e declaracion y pago di impuesto. Teniendo un administracion responsabel, e comerciante por cumpli despues debidamente cu su declaracion y pago di inkomstenbelasing of winstbelasting y e declaracion di BBO/BAZV, sin tin mester di core risico despues di haya un cobransa adicional inclui boet.

Di e forma aki Departamento di Impuesto ta spera di por yuda na eleva e cumplimento pa cu e debernan di belasting cerca entre otro e bendedornan di clapchi.