Presidente Venezolano kier cera comunicacion cu islanan ABC

ORANJESTAD/CARACAS – Presidente Venezolano Nicolas Maduro diamars anochi a menaza di cera e via di comunicacion entre Venezuela y islanan ABC. Esaki debi cu segun Maduro, tin mucho ‘mafiamento’ tumando lugar di producto entre e pais Venezolano y e islanan ABC. “Ami a pensa pa sera tur via di comunicacion di comercializacion di tur tipo, aero y maritimo cu Aruba, Corsou y Bonaire na cualkier momento” Maduro a bisa. “Mi a pense seriamente. Pa e mafia. Nan ta hiba tur cos, tire, zeta, shampoo, cuminda, tur cos “. E declaracion ey a keda televisa diamars anochi y a bira topico di combersacion awe mainta. Di parti di gobierno di Aruba, NoticiaCla a compronde di prome minister Evelyn Wever, cu ta atendiendo e asunto cu departamento di relacionnan exterior di Aruba y Hulanda.

FALCON

E declaracion di Maduro a cay den un siman unda cu tabatin basta noticia for di e pais bisiña, cuminsando cu un declaracion mutuo entre Aruba y Falcon, cu e mesun persona cu awe Maduro a pidi pa bay Aruba y Corsou pa atende cu e asunto. “Mi a pidi gobernador di estado Falcon Victor Clark pa bay Aruba uy Corsou pasobra Aruba y Corsou nan ta desmembrando nos” Maduro a bisa. Ta netamente cu Clark, Aruba recientemente a tene combersacionnan riba e tema di comercializacion entre Falcon y Aruba, unda cu a aparece un potret di director di DBB Edwin Abath y e gobernador di Falcon, esta Victor Clark. Despues tabatin e episodio di ex minister Booshi Wever cu a hala atencion di prensa Venezolano riba posibel robo di gasoline for di Falcon pa Aruba. Speculacion mientrastanto ta cu e noticianan aki a hala atencion di e presidente cu e reaccion necesario ayera nochi di presidente Venezuela. Foto cortesia http://www.thebubble.com