Andin Bikker: Por a evita crisis constitucional

ORANJESTAD – E crisis constitucional actual entre Aruba y Hulanda por a wordo evita. Si a implementa e asina yama ‘begrotings kamer’, nada di esaki lo mester a sosode. Esaki ta e pensamento di parlamentario pa partido Democracia Real Andin Bikker. Mes momento e ta lamenta e retiro di minister Juan David Yrausquin, y ta considera e retiro como prematuro. “E mester a conta te 10 y wak despues con ta para” Bikker a bisa. Ademas Yrausquin lo por a warda e resultado di e investigacion actual, y despues dicidi kico pa haci.

Bikker su reaccion diamars mainta, ta sigui mustra cu e situacion aki por wordo resolve, si ainda acepta e concepto di e begrotingskamer manera proponi. E lo ta e miho forma pa Aruba ‘recobra’ su autonomia cu den concepto di Bikker, Aruba a perde. E tramite por ta uno practicamente facil, door di recomenda e comision, pa medio di un LB Ham via decreto y asina laga esaki funciona bou di Raad van Advies. Finalmente, Bikker ta mustra cu mester bin un Corte Constitucional pa evita problemanan manera cu ta sosodiendo aworaki. Algo cu por cierto propio Juan David Yrausquin y lider di fraccion di AVP Rene Herde mes a propone na 2010. Un Corte asina lo mester por ‘hak de knoop door’ den casonan manera aworaki.