Corte: De Sousa director Arubahuis of docente bek?

ORANJESTAD – Ex parlamentario Desiree de Sousa Croes tin derecho pa haya su funcion ‘bieu’ bek como director di Arubahuis, basa riba e hecho cu nunca e no a wordo ‘retira’ of baha cu pensioen den e funcion ey. Asina abogado Peter Mohamed a argumenta den corte awe mainta pa su cliente. De Sousa (den corte menciona como Croes) a entama un caso contra Gobernador di Aruba y minister di Asuntonan general, cu no kier acepta pa de Sousa bolbe na su ‘funcion bieu’ di Director di Aruba sino kier pa e bay bek na ta docente. Huez ta dicta dia 8 di januari ken tin razon den e caso aki.

MOHAMED

Argumentacion principal di abogado Mohamed, ta cu Croes tin un decreto nacional (landsbesluit) cu ta nombre como director di Arubahuis na 2009 y a tuma e posicion na 2010. E argumento den corte tabata cu, mientras cu enberdad e director di Arubahuis ta fungi como Minister Plenipotenciario interino ora necesario, Croes nunca no a haya e nombracion oficial ey. Si a haya e nombracion enberdad den e caso ey e ta bira un funcion politico. Problema ta cu e persona, segun statuut, un persona no por fungi como ambtenaar (director Arubahuis) y Minister Plenipotenciario interino pareu. Como tal tin e provision cu e persona prome e por fungi como e reemplazante di e minister, e mester keda nombra segun landsbesluit, oficialisando e funcion. Ademas tin cu cera un contracto di trabou pa e funcion ey cu e persona. Pero manera menciona anteriormente caba, e problema den e caso aki ta cu segun Mohamed (y despues Croes mes a confirma esaki riba pregunta di e huez), su cliente nunca no a keda nombra oficialmente como reemplazante di e minister, nunca no a eherce e trabou y tampoco a haya compensacion financiero pa esaki tampoco. Pues semper e tabata solamente ambtenaar, y no a eherce e funcion politico e tempo ey, te pa gobierno uza e argumento ey como defensa. Huez dado momento a puntra a abogado pa gobierno, J. Senchi, si e por prueba un caminda cu Croes berdad algun bez a keda nombra como reemplazante oficial di minister plenipotenciario, Senchi a admiti cu e no tabata por a produci e prueba ey esey. “E asunto no a wordo regla nechi, enberdad” Senchi a contesta huez e momento ey.

DWJZ

Den e defensa di gobierno, e abogado Senchi a cuminsa na argumenta cu no tin base pa urgencia (spoedeisend belang) den e caso aki, ya cu e.o. cu financieramente e persona (Croes) no a keda afecta. Por lo menos si esey tabata un motibo di urgencia pa a trata e caso aki. Ademas, segun Senchi, Croes a haci uso di su derecho pa pidi pa overbruggings toelage cual suma sigur no ta nada malo, (zeker geen onredelijk bedrag). Tambe Senchi a argumenta cu e carta cu Croes a haya di prome minister, tabata di un caracter informativo y no un tipo di decision (beschikking) riba cual por entrega un obhecion legal (bezwaar). E argumento cu ora cu Croes a asumi e funcion di director di Arubahuis, a pone riba nonactief pa su funcion di docente (ambtenaar), ta nifica cu e no ta ambtenaar mas y por a fungi como reemplazante di e minister plenipotenciario. “Cu berdad e nombracion nunca a wordo formaliza pasobra Croes a bira Parlamentario, no ta importa”, Senchi a bisa den su defensa. Y finalmente segun Senchi, nombracion di Croes como Parlamentario ta implica cu pa ley, e funcion di director di Arubahuis ta caduca despues di tres luna. Y den bista di gobierno, mirando cu a termina e funcion como director di Arubahuis, e tin cu keda reinstala den su funcion bieu di docente na Dienst Publieke Scholen.

Huez a cera e caso, y lo dicta sentencia dialuna 8 di januari 2018.