Otro aña ta dicidi si ta habri trafico pa Caya Grandi of no

ORANJESTAD – Ora aña bolter, despues di e prome 90 dia di aña 2018 gobierno lo tuma un decision riba e temanan di Caya Grandi Betico Croes, manera habri caya pa trafico, pone dak riba e caya, y atende e parti di aruparking. Asina prome minister Evelyn Wever Croes a declara durante un conferencia di prensa. Trabaonan di e comision recien instala pa trece bida den Caya grandi a cuminsa, segun prome minister Evelyn Wever Croes den e conferencia di prensa dialuna mainta. Otro aña lo trece e cambionan necesario segun Wever Croes. E ora lo atende e tema si ta habri e caya pa trafico, si ta tapa caya grandi cu un dak, y con ta bay atende cu e parti di Aruparking. Mientrastanto a apunto Alexlindy Croes pa organisacion di actividadnan pa e fin di aña den Caya Grandi.