Prome cu fin di aña tin decision riba mando policial

ORANJESTAD – Prome cu fin di luna lo tin un decision riba e situacion cu mando di polis na KPA. Minister di husticia Andin Bikker awe mainta a admiti na NoticiaCla cu a tuma mas tempo cu a kere pa bin cu claridad riba top di polis. El a admiti (durante conferencia di prensa semanal di gobierno) cu a bisa berdad cu lo a bin cu un anuncio siman pasa, pero e no a logra bin cu un decision ainda. “Hecho ta cu a pone como meta, mas pronto cu ta posibel. Ta spera cu pa prome cu fin di aña, tin claridad riba kico lo pasa eynan” Bikker a sigui bisa. Riba e pregunta cu si entre otro actual comisario Trudy Hassell ta un posibel candidato, Bikker a bisa e portal aki cu e no kier anticipa riba e rumornan ni riba nomber di ken por bira e proximo hefe maximo di polis. Pa loke ta e decision, si esaki ta encera anuncio formal di un cambio di hefe di polis, a bisa solamente cu tin deliberacion cu hefe di polis pa wak kico e ta bay haci, aunke no kier bisa cu pa fin di aña lo anuncia cu esaki ta nifica cu lo haci un anuncio si ta un korpschef nobo lo wordo anuncia. A bisa na final cu no tin un vacatura, aunke cu e korpschef a anuncia cu e kier bay, y lo bin un open solicitatie pa e funcion.