Huez awe ta scucha polis envolvi den morto tragico di Zinnia Croes

ORANJESTAD – Awe mainta huez ta scucha e polis cu tabata envolvi den e morto tragico na 2015 di e hobencita Zinnia Croes. Den combersacion cu e mama Michella, a confirma na NoticiaCla cu awe tin chens pa husticia pa por haya sa kico realmente a sosode e diabierna anochi laat cu a conduci na morto di e hobencita. Ta riba insistencia di e mayornan, cu na September a apela e decision di OM pa no persigui e polis, a bin cambia e proceso y bay hoger beroep cu awor a dicidi pa scucha e polis y wak kico realmente a sosode e anochi tragico ey. E caso ey ta tuma lugar awe mainta 10’or den corte, tras di porta sera.

E ACCIDENTE

E accidente mes a sosode diabierna 13 di maart den oranan laat di atardi na altura di Pos Chikito, ora cu un auto, maneha pa un polis na civil den su tempo liber, a alcansa un mucha. Su mañan e victima Zinnia Croes a fayece na Hospital debi na e sla nan ricibi. Investigacion na e sitio mes a demostra tambe cu e chauffeur tabata bou influencia di alcohol, o sea a surpasa e nivel di alcohol den su rosea, ora a haci test cune na e sitio di accidente y despues tambe na Warda di Polis.

INVESTIGACION

Den tipo di casonan asina, ta start un investigacion riguroso den cual e ekipo forensico di Polis ta investiga tur detaye di e auto, riba caminda, ta scucha testigonan cu a mira e accidente sosode y ta interoga esunnan envolvi directamente pa na final hinca tur esey den un Proces-verbaal cu ta bay na Ministerio Publico. Pero prome cu esey tur detaye mester ta bon investiga, cu tin biaha hasta ta rekeri testnan cu mester bay te laboratorio hudicial na Hulanda y regresa. Ta pesey tin biaha e tipo di investigacionnan asina por tuma mas tempo cu normal.

POLIS

Den e caso specifico aki, como cu e chauffeur di e auto ta un Polis, a envolvi Lands Recherche den e proceso pa por garantiza tur partido envolvi cu ta mantene e mesun nivel di transparencia y neutralidad necesario, teniendo cuenta cu e hechonan, den cuadro di e investigacion penal andando.