OM den defensa pa caso di malversacion propiedad bestuurskantoor

ORANJESTAD – Ministerio publico di Aruba a haye ta bay den defensa diabierna atardi, relaciona cu e caso di malversacion di propiedad di bestuurskantoor. Esaki basa riba tanto informacion circulando riba e caso, unda cu ta tilda cu lo a trata e caso aki diferente y cu influencia di gobierno. “Ministerio Publico a acerca e denuncia den completo neutralidad. Mescos cu den cualkier otro caso, a cuminza un investigacion penal obhetivo” e comunicado ta bisa entre otro. Ta trata e caso unda cu equiponan visual a ‘disparce’ for di bestuurskantoor y pa cual despues cu a entrega keho, detencion a cay di algun persona conoci den comunidad.

DENUNCIA

Ministerio Publico den e comunicado, a sigura cu nan a ricibi siman pasa un denuncia for di cual a resulta cu señor Marko E.C. posiblemente a haci su mes culpable na malversacion di algun propiedad cu lo ta perdi di bestuurskantoor, desde entrego di gobierno anterior na gobierno actual. “Den varios medio di comunicacion e topico aki a wordo poni den un contexto mucho mas amplio, y dor di esey el a haya un dinamismo bastante particular”.

OBHETIVO

Aki e departamento a bay den defensa pa clarifica kico tur nan a haci y con a atende cu e asunto. “ Ministerio Publico di su parti ta haya importante pa enfatiza cu e denuncia contra E.C. a wordo huzga unicamente riba su meritonan penal, y tambe cu ta a base di esey so Ministerio Publico a traha riba e aangifte. Varios persona tabata envolvi, y a haci huiszoeking bao guia di Huez-Comisario, unda a tuma cosnan den beslag.

DETENCION

OM a sigui splica cu despues di tur esey, e sospechoso E.C. a wordo deteni. “Tur e pasonan aki cu Ministerio Publico a tuma, tabatin nan hustificacion den e informacion cu na e momento ey tabata disponible”.

LIBERTAD

Segun ministerio publico, aunke nan no ta cla cu e investigacion ainda, no tabata necesario mas na e altura aki di e investigacion pa e sospechoso E.C. keda den detencion. “Pesey el a wordo poni den libertad riba 13 di December ultimo” e comunicado ta finalisa bisando .