Otro siman ta trata caso ex Parlamentario contra Prome Minister

ORANJESTAD – Diamars awor Corte ta trata e caso cu ex parlamentario Desiree de Sousa Croes a entama contra prome minister Evelyn Wever Croes, pa e haya su trabou ‘bieu’ bek como director di Arubahuis. De Sousa a confirma na NoticiaCla diabierna mainta cu e caso cu e la entama ta contra prome minister mes pasobra e ta esun cu a tuma e decision di no honra e landsbesluit di de Sousa. E caso ta tuma lugar pa 9’or di mainta, unda de Sousa lo pidi huez pa honra su landsbesluit.

E PROBLEMA

Manera ta conoci despues di eleccion ultimo na September, e resultado a pone cu varios politico cu tabata parlamentario, no a bolbe den e funcion ey. Un di nan tabata Desiree de Sousa, cu a dicidi pa bay su funcion bieu bek, cu segun su persona tabata director di Arubahuis conforme su ultimo landsbesluit. Sinembargo el a ricibi un carta di prome minister riba prome dia cu e prome mandatario a sinta den su funcion, informando de Sousa cu e tin cu raporta bek na scol, den su funcion como docente. De Sousa no tabata di acuerdo cu esey y a dicidi di entama un caso pa bringa e decision ey. El a bay Hulanda pa por prepara pa cuminsa cu su funcion bek di director di Arubahuis, pero na Aruba no kier a honre. E ta na Aruba bek mientrastanto y ta cla pa e caso diamars awor, segun el a informa NoticiaCla.com.