Gobierno y Setar a firma proyecto di digitalization pa tur scol na Aruba

ORANJESTAD – Tur scol na Aruba lo tin Wi-Fi, prome cu aña escolar 2018/2019. Esaki a keda confirma diahuebs mainta durante un conferencia di prensa di gobierno, unda cu Setar a compromete su mes cu dentro di e periodo di 9 luna of menos, lo por keda cla cu e proyecto di ‘digitalization’ di tur scol na Aruba, cu tin un prijs di algo mas cu 1 miyon florin (AFL 1.044.330,00) y financia principalmente pa fondonan final di Fondo Desaroyo Aruba. A haci mencion di tur scol, pero a menciona den e conferencia, kleuter, basis, MAVO y EPB. Segun minister di enseñansa Rudy Lampe, e proyecto ta parti di e plan nacional di enseñansa 2018-2028, unda cu e palabra clave ta ‘digitalization’. Mester haci mencion cu Setar a duna gobierno un descuento di 10% riba e gastonan total y ademas a haci un donacion di 44.330,00, pa asina cumpli cu e hecho cu e suma disponibel pa gobierno tabata ‘solamente’ 1 miyon florin.