Opinion: Conflicto entre reportero Speed Andrade y Presidente di Parlamento Ady Thijsen

Opinion: Conflicto entre reportero Speed Andrade y Presidente di Parlamento Ady Thijsen

Posted on 12/14/2017 10:24 am AST | Updated on 12/14/2017 10:46 am AST

E conflicto entre reportero Speed Andrade y Presidente di Parlamento Ady Thijssen.

Historia sa ripiti su mes

 No ta pa promer biaha cu un conflicto entre un reportero y un politico / oficial di gobierno riba nos islanan to culmina den un prohibicion di gobierno cu ta limita e reportero den su funcionamento profesional.

Tampoco ta promer biaha cu e reportero ta hiba gobierno corte pa kita en prohibicion aki.

Mi ta pronostica cu tampoco lo ta prome biaha cu corte lo bati gobierno riba su dedenan den un caso asina.

Na aña 2004 e reportero di Amigoe, Marjo Nederlof a wordu prohibi di atende conferencianan di prensa di Ministro-Presidente, Mirna Godett, despues cu a surgi un pleito entre nan dos.

Amigoe y Nederlof a hiba gobierno corte pasobra e prohibicion tawata un violacion di e derecho di prensa pa eherce su trabow, cual derecho ta un elemento fundamental di e derecho di expresion liber cu ta wordo proteha den articulo 10 di EVRM (Tratado di Union Europeo pa proteccion di drechonan humano). E medida ademas tawata discriminatorio y en contra di e prohibicion di discriminacion di articulo 14 di EVRM ya cu Nederlof tawata e unico reportero cu a haña un tal medida.

Corte den Promer Instancia na Corsow, den su veredicto di 24 di januari 2004 a duna Amigoe y Nederlof rason y a ordena gobierno pa duna admision na Amigoe y Nederlof na e conferencianan di prensa di Ministro-Presidente mescos cu tur otro medionan di prensa y reporteronan.

E ta bale la pena pa lesa e verdicto aki, cu por haña facilmente online. No solamente pasobra e decision ta relevante pa e caso di Speed Andrade vs Ady Thijssen / Land Aruba, pero tambe pasobra e juez Bob Wit a hinca algun consideracion interesante y al caso den su veredicto.

Pa loke ta politica e ta cita Groucho Marx : ”Politics is the art of looking for trouble, finding it everywhere, diagnosing it incorrectly and applying the wrong remedies”. Pa loke ta e conflicto entre Nederlof y Mirna Godett e ta bisa : “‘nan sanger no ta sali ku otro”. Otro consideracion : “Een bananenrepubliek zijn wij niet en dat moet ook zo blijven”. Finalmente : “Machthebbers, politieke gezagsdragers dienen zich dan ook steeds voor te houden dat zij op elk moment weer in de oppositie kunnen komen en dat zij dan de rechten, waarvan het nu opportuun lijkt om die in te perken, weer hard nodig kunnen hebben”. Kiermen cu e gobernantenan no mester lubida cu limitacion di e libertad di prensa y expresion door di gobierno ta un cuchiu cu ta corta na dos banda. Mi ta kere ku e veredicto aki ta contene varios les cu te awe ta relevante ! e vonnis ta AKI. 

 Autor: Abogado Johan Sjiem Fat  

 

  • Powered by SETAR