Kock: Ta demanda Gobierno pa a prohibi periodista drenta Parlamento

ORANJESTAD – Gobierno di Aruba (Land Aruba) ta wordo demanda pa un periodista pasobra a prohibi’e di drenta edificio di Parlamento. Abogado David Kock a confirma na NoticiaCla cu diaranzon mainta a entama e caso, y ta pendiente su tratamento. Mientras cu e asunto tin basta dia ta ‘cushina’ entre e periodista (Nelson ‘Speed’ Andrade) y presidente di Parlamento Ady Thijsen, awor cu e ta den man di corte, el a haya un dimension diferente, cu por bira un hurisprudencia interesante. Segun Kock, mientras cu ta trata Parlamento, e forma con pa atende cu esaki ta pa demanda land Aruba. E tema segun e abogado ta uno peligroso pasobra e ta ‘grens aan censuur’. Sigur si ta trata algo pa cual e periodista ta wordo castiga pa algo cu a sosode pafo di Parlamento.

REGLA

E asunto a cuminsa ora cu e periodista a drenta Parlamento recientemente, cu ayudo di algun miembro di Parlamento. Seguidamente el a haci un raportahe, sinta riba e stul di e presidente di Parlamento, riba algun tema. Ora cu esaki a sosode, Parlamento a atende cu e periodista y mande un carta, unda cu ta hala su atencion riba e hecho aki. Pero despues cu a hala su atencion den un di dos carta y prohibi’e entrada den e edificio, e periodista a bay radio y den su noticiero a comenta riba e asunto. Aki ta unda cu Parlamento a mande un otro carta, unda cu ta hala su atencion riba e contenido di su comentario den su noticiero. A dicidi di prohibi e periodista entrada pa 3 luna di tempo den edificio di Parlamento. Abogado Kock ta mustra riba e hecho cu berdad tin regla pa mantene orden den Staten pa algo cu no tin nada di haber cu faltamento di orden den Staten mes. “Den nos parecer e ta wordo inhustamente uza den e caso aki”.

DEMANDA

E demanda specifico ta pa 1. Kita e medida di no laga e periodista drenta sala di Parlamento, pasobra bo ta prohibi un miembro di prensa di haci su trabou, a base di loke segun e abogado, ta un vendetta personal di e presidente di Parlamento contra e miembro di prensa. Tambe ta pidi pa e periodista wordo trata igual cu tur otro hende di prensa.

TIN CASO

A puntra e abogado si nan tin caso, debi cu Parlamento ta mustra riba e hecho cu nan no a manda nada foi sla pa e periodista. Y si e problema ta cu e periodista a drenta Parlamento sin permiso, of sinta riba e stul di presidente di Parlamento of e declaracion haci den programa di e periodista. Segun Kock, tin dos aspecto di cartanan cu su cliente a ricibi. E prome carta ta alerta e periodista riba maneho nobo unda cu un periodista por drenta e sala solamente riba invitacion di un parlamentario. Algo cu segun e abogado, ta wordo respeta sigur. Y tambe cu no ta permiti pa e persona (periodista) sinta den stul di e periodista. Segun e abogado, si cos a yega te eynan so, no tabatin base pa un caso. Pero e cos ta cambia na momento cu e persona (e periodista ta e unico cu a ricibi e carta di e maneho nobo aki segun e abogado) critica e decision pafo di Parlamento, a haya ta bon pa bay duna e periodista un straf. Pues e no ta pasobra el a drenta Parlamento, sino pa loke el a bisa na radio. “E ta cuminsa bira cu libertad di expresion ta bin na peliger, si actonan asina mester wordo acepta y goedgekeurd” Kock a sigui bisa.