Ruiz: Ex minister Arends no mester ta sorprendi pero bergonza!

ORANJESTAD- Ex minister Arends no mester ta sorprendi pero bergonza. Asina minister di finanzas Xiomara Ruiz Maduro a reacciona den un comunicado riba e declaracion recien di Arends den un programa di NoticiaCla LIVE recientemente. Segun e comunicado, ‘ministerio di Finanzas a tuma nota di declaracion cu ex-Minister Richard Arends, kende tur tempo tabata consehero principal di Eman y Bermudez, a trece dilanti cu e ta sorprendi cu gobierno nobo no por cumpli cu CAFT’. Den tal programa Arends a mustra cu e no ta compronde con gobierno di AVP si a logra y MEP no.

ANTICUA

Segun e mandatario e actitud y practica di ex- Minister Richard Arends ta un di e motibonan di e mal herencia laga atras pa gobierno anterior, un pais cu debe astronomico y supervision financiero. “Ta incomprendible cu ainda por tin hende cu kier sigui manipula y tapa e realidad mientras cu nan ta autor di a masacra nos finanzas publico, pone nos pais Aruba bou supervision financiero y degrada nos credibilidad financiero” Ruiz ta bisa den e comunicado. Segun e mandatario, niun hende no por tuma ex-Minister Arends na serio, y con e por tin e curashi pa declara cu e ta sorprendi! Esaki ta "schoolvoorbeeld" di politica anticua y cu nos pueblo a desaproba.

SORPRENDI

E mandatario di finanza ta mustra cu net ex-Minister Arends ta papia di ta sorprendi? Ta su persona tur tempo tabata consehero principal di ex-Minister Eman y Bermudez. E gobierno di ex-Minister Arends a pasa pa historia pa uno cu a kibra ley y manipula cu informacion y cifra. E ex-minister kier pa Pueblo lubida cu ta su partido tabata sinta den gobierno y ta su persona tabata e consehero principal. “Arends mester bira serio, ta hopi lihe el a contagia cu e malesa di trece mentira y manipula cu informacion” . Ta pa motibo di nan mal gobernacion, mal maneho financiero, gobierno di reino a impone supervision financiero riba e gobierno di AVP. “ Con bo por ta sorprendi, despues cu abo y bo gobierno a daña cos y awor boso kier haci como sifuera cu boso no sa di nada. Richard Arends, Bo no mester ta sorprendi, pero mas bien bergonza, pasobra bo mester por sa miho y tog bo a scoge pa hunto cu bo gobierno masacra nos pais.

Si boso tin un poco berguensa ainda sera boca, keda keto of papia "een toontje lager". Ruiz a sigui bisa.

PRESUPUESTO

Segun Ruiz, e gobierno nobo su punto di bista ta pa ta transparente y presenta e situacion financiero manera cu e ta! Despues di un analisis di expertonan y instancianan concerni a bin resulta cu gobierno anterior a laga un Presupuesto Supletorio 2017 cu un deficit extra di 130 miyon y pa Presupuesto 2018 un deficit di casi 200 miyon. Minister Ruiz-Maduro ta sigura cu desde promer dia ta asumiendo su responsabilidad cu seriedad y ta trahando riba solucionnan pa hiba nos pais den un finanzas publico saludable, manehable y sostenible a termino largo. “Esnan cu a masacra nos pais cu nan grito di manipulacion lo no stroba e mandatario cu su compromiso pa nos Pueblo” Ruiz a finaliza bisando.