Vingal: A deporta mas di mil hende caba for di Aruba den 2017

ORANJESTAD – E estadistica pa deportacion di hende a aumenta drasticamente e aña. Asina hefe di imigracion Gerald Vingal a confirma durante un conferencia di prensa e siman aki. Segun Vingal pa prome biaha, a deporta mas di 1000 hende for di Aruba na 2017, y ainda falta algun siman. Pa loke ta maneho di turista, ta garando turistanan tambe cu ta bin nos isla pa vacacion y termina trahando. E hefe ta sigura cu e maneho di bishitante no a cambia y ta keda fuerte.

MANEHO

Hendenan cu ta drenta Aruba cu nan ID card cu intencion pa keda nos isla 3 dia, nan mester por presenta 450 dollar cash, mas parti tratando di e grupo Venezolano. Asina hefe di imigracion Gerald Vingal a sigui bisa durante e conferencia di prensa. Otro nacionalidad di turista por tin un credit card cu por mustra cu nan tin suficiente fondo riba dje pa cubri nan estadia na Aruba. E persona cu pasa su tres dianan, mester bandona Aruba. Nan no por bin na remarke pa pidi un extension turistico, pasobra den e tres dianan ey bo no ta bay haya un cita tampoco segun Vingal. “Si bo a pidi tres dia y tin e placa ey, ora cu bo tres dia pasa, bo tin cu sali. E di dos categoria cu Vingal a repasa un biaha mas, ta esun cu ta pidi formulario di garantia. E personanan aki ta haya e maximo di 30 dia manera ley ta prescribi, y si nan kier un extension turistico, nan mester cay bou di e categoria manera inversionista etc, y no ta automaticamente mas ta bin na remarke.