Pa AZV loke ta keda semper importante ta e aspecto medico

ORANJESTAD – Pa AZV, calidad ta bin na prome lugar y despues e aspectonan financiero. Pensamento di director di AZV Anko Ringeling. E ta reacciona despues di e prome ‘open heart missie’ na hospital Horacio Oduber Hospital.

Despues di preparacionnan cu a dura por lo menos un aña y mey, Dr. Horacio E. Oduber Hospitaal, hunto cu cardiologonan na Aruba, gobierno y AZV a embarca riba un proyecto nobo pa Aruba algun luna pasa. E di prome “Open Hart Missie”, unda nuebe pashent a wordo opera na nan curason na nos hospital mes a rekeri hopi preparacion hunto cu e team di specialista medico Hulandes cu a haci e operacionnan.

Ringeling a splica cu pa AZV loke ta keda semper importante ta e aspecto medico – ta responsabel pa e procedura/tratamento tuma luga na Aruba y tin un garantia di calidad halto. Y, na di dos luga AZV ta tene cuenta cu e aspecto financiero.

Despues di a ricibi e resultadonan positivo di e “Medical Audit” traha pa Professor Robert Klautz di Hulanda di acuerdo cu e normanan di Nederlandse Vereniging voor de Thoraxchirurgie, e director di AZV a expresa cu pa loke ta trata calidad tur cos ta mustra positivo. Hospital ta e prome yama pa mira si e operacionnan ey por wordo haci na Aruba na un forma responsabel; tur cos ta mustra positivo te awo y si e ta pagabel lo por haci esaki un facilidad permanente, el a expresa.

El a splica cu, awendia ainda, pa manda un pashent Colombia pa operacion y/of tratamento ta sali menos cu si ta haci e operacion y/of tratamento na Aruba. Esaki ta inclui tur gasto di e pashent, incluyendo hasta e gastonan cu AZV ta haci pa e acompañante. E tin di haci cu e volumen di e pashentnan y como cu na Aruba menos pashent ta wordo trata, mas caro e tratamento ta sali. AZV ta colectando e cifranan ainda pa evalua y compara e casonan di cada pashent cu a ricibi tratamento durante e prome mision. Despues di e di dos mision of mas mision lo tin un miho bista riba e gastonan. Mirando e volumen di pashentnan, cu ta relativamente abao, AZV no a yega na conclusionnan definitivo ainda, Ringeling a bisa.

Tin un di dos mision planea pa tuma luga na fin di september. Pashentnan cu a wordo yuda a keda masha satisfecho con nan a wordo yuda na Aruba. E manera cu a trata nan na cas mes ta sirbi como un estimulo y motivacion pa sigui cu e proyecto, tanten cu e ta responsabel pa cu gastonan. Actualmente Aruba ta manda mas of menos 130 pashent pa exterior pa aña pa haya tratamento pa condicionnan di curason. Mayoria pashent ta bay Colombia.

Documentario 

Dr. Horacio E. Oduber Hospitaal ta invita comunidad henter pa sigui e desaroyo importante aki den e mundo medico na Aruba mas di cerca. Pa un miho idea di con e prome operacion a bay, sintonisa TeleAruba diahuebs awo, 25 di september, pa 7’or di anochi pa e documentario “Bo Curason...den nos man!” E documentario, cu un duracion di 30 minuut, ta sigui e prome pashentnan cu a haci un “open hart operatie” na Aruba durante e proceso di preparacion, operacion y post-operacion, ilustrando momentonan di hopi emocion y curashi.