Problema cu drenahe tin construccion rotonde ex Codemsa pega

ORANJESTAD – Problema cu drenahe di awa tin e proyecto di rotonde di ex Codemsa pega. Asina director di DOW Marlon Croes a declara diaranzon mainta. Segun e director, e contratista a nota cu e drenahe pa awa cu nan tin no ta esun miho. Ta conoci cu cada bes desde cu a cuminsa traha e rotonde y e camindanan, ora awacero yobe, e lugar ta comberti den un tipo di piscina olimpico. Como tal, segun Croes, a opta pa busca expertonan Hulandes pa yuda consulta riba e tereno aki y bin cu un miho plan di drenahe pa awa, compara cu loke tin awor. Inicialmente tambe Croes a declara cu e problema cu e duiker riba e caminda entre FCCA y ex Codemsa tabata motibo di e tardanza y cu e proyecto ey lo a keda cla pa december. Esey tampoco no a keda cla. Croes no a bisa pa ki tempo e parti aki di e proyecto di Watty Vos Boulevard lo termina.