Rehabilitacion refineria CITGO Aruba coriendo retraso di 6 pa 9 luna

ORANJESTAD – E proceso di rehabilitacion di e refineria CITGO a acumula un retraso basta grandi, pero ainda Refineria di Aruba (RDA), compania doño di e refineria, tin speranza cu e refineria por cuminsa opera (startup) 1 di October 2020. Segun CEO y presidente di RDA Alvin Koolman, CITGO Aruba ta mara contractualmente cu pa e fecha ey e mester ta operacional, sino tin un kiebra di contracto (breach of contract). No obstante esey, tin un retraso di entre 6 pa 9 luna pa loke ta e trabaonan di rehabilitacion, si no ta mas, cu ta pone cu e prome ‘fase’ di rehabilitacion por cuminsa te mitar di 2019, y e ultimo parti 2 luna despues. Esaki contrario na e 18 pa 24 luna cu a pone pa e ‘fasenan’ di rehabilitacion cuminsa despues cu a firma e acuerdo na October 2016.

RETRASO

Segun e palabracion inicial, lo a dura entre 18 pa 24 luna di tempo prome cu e prome ‘trein’ (fase) por a cuminsa opera cu ta pone na mas tarda den 2018. Pero na februari y despues juli di e aña aki, a compronde cu lo tin un delay cu ta pone cu e prome ‘trein’ lo mester a cuminsa final di 2018, y e di dos trein, den e prome cuartal di 2019. Awor cu e retraso extra, cu e cambio den top etc, ta mira cu e prome trein por cuminsa den e prome cuartal di 2019 y e di dos trein den e di 3 cuartal di 2019. Asina ainda, Koolman ta kere cu e refineria por habri segun planificacion cu ta 1 di October 2020. Si no mira nada di accion ainda prome cu 2020, por papia di un ‘breach of contract’ osea kiebra di contracto, pero ainda no ta asina leu, segun e presidente/CEO Alvin Koolman.