Bishita di Consul General Surnam no a resolve problema Insel Air

ORANJESTAD – E ultimatum pa gobierno di Surnam contesta gobierno di Aruba riba e asunto di Insel Air Aruba ta keda vigente. Minister di Transporte Otmar Oduber a confirma na NoticiaCla.com diamars mainta cu e reunion cu Consul General Delano Braam di Surnam di dialuna atardi, -aunke e la bay den bon ambiente-, no a logra resolve e problema. “A discuti e tema si y a mustra e Consul Gerenal riba e importancia pa resolve e problema” Oduber a sigura NoticiaCla.com. Esey sinembargo no ta nifica cu e problema ta resolvi, y como tal e impasse ta keda vigente. Un bruhamento di mandamento di documento inicialmente dialuna a duna e impresion eroneo cu e reaccion di Surnam lo a drenta. “Pero esaki no tabata e caso” Oduber a bisa.

Tabata dialuna atardi cu e mandatario di Aruba a reuni cu e Consul General, riba varios tema (entre otro un proyecto di agricultura cu lo keda presenta dentro di poco) y unda cu e topico di e impasse tambe a keda toca.

E ultimatum presenta siman pasa diabierna ta indica cu gobierno di Surnam tin 5 dia pa reacciona riba e situacion di Insel Air Aruba, sino gobierno di Aruba lo prohibi buelonan di Surinam Airways pa bula pa Aruba y for di Aruba den un periodo di 6 luna. E mandatario diabierna ultimo a manda un carta pa su homologo di transporte Falisi Pinas, pero e no a haya reaccion for di dje pa e asunto di Insel Air Aruba su problema di bula pa Surnam.

Segun e mandatario, mirando cu a bira 2 luna cu e compania local cu tin un permiso local y a haci un peticion legal pa bula entre Aruba y Surnam pa bula a base di e acuerdo di open sky policy, e la pidi e atencion na Pinas, pa por ricibi e reaccion aki. E foto ta mustra momento di e reunion entre minister Oduber y e Consul General