Gobierno: Prome equiponan “fia” for di Bestuurskantoor a cuminsa yega bek

ORANJESTAD – E prome equiponan cu a worde “fia” for di Bestuurskantoor a cuminsa yega bek. Asina un comunicado di gobierno dialuna atardi a bisa. Hunto cu e comunicado, a bin algun potret cu equiponan di cual ta referi na dje. E equiponan ey a bolbe Bestuurskantoor awe den dia segun e comunicado. Awe mainta ainda prome minister Evelyn Wever Croes durante un conferencia di prensa a pidi tur esnan cu por tin ekipo ainda, pa trece nan bek. No ta conoci si ta basa riba e peticion aki, algun di e equiponan aki a bolbe Bestuurskantoor. Segun e comunicado, esaki ta un parti hopi chikito cu awe mainta a worde entrega pa un coordinador di Ex Minister Mike de Meza.

COORDINADOR

Segun gobierno, e coordinador en cuestion no ta esun cu originalmente a bay cu e equiponan, pero mas bien a haci lo corecto di trece nan bek pa su doño cu ta Land Aruba. E equiponan aki tabata den man di e persona encarga cu prensa di Ex Minister Mike de Meza.

SUSTO

Segun gobierno, “aparentemente ta hopi hende liga na e gobierno anterior lo ta canando rond cu un susto basta grandi, considerando cu tin un investigacion andando, pa asina recobra e mas di 200 mil florin na ekipo cu a desaparece na momento cu Gabinete Mike Eman II a baha”.

DETENCION

Mientrastanto tin un persona deteni ainda den e caso aki, cu ta e conocido Marko E, cu diabierna a tende cu su detencion a keda prolonga cu 8 dia mas.