Empleadonan representando Reino Hulandes uni den atardi deportivo

Den Haag – Un grupo entusiasma di empleadonan cu ta traha na e diferente representacionnan di Reino Hulandes, a bini hunto pa tuma parti na un atardi deportivo masha agradable riba diahuebs, 18 di september ultimo. Riba iniciativa di e Gabinete di Minister Plenipotenciario di Aruba na Den Haag, hunto cu empleado di Gabinete di Minister Plenipotenciario di Curaçao, como tambe e Ministerio di Relacionnan di Reino Hulandes, a acepta e invitacion pa a bini hunto pa un competencia deportivo. E tres instancianan aki a lucha amistosamente contra otro riba tereno di volleyball y domino. Pa cada categoria tabatin dos premio, esta pa e ganador como tambe pa e segundo lugar. Tanto e equipo Hulandes, como tambe esun di Curaçao, cada uno a gana un premio pa e segundo puesto, respectivamente pa volley & pa domino. Pues pa ambos categoria e equipo di Aruba a sali victorioso.

Tanto Minister Plenipotenciario di Aruba Alfonso Boekhoudt, como tambe representantenan di Curaçao y Hulanda, respectivamente Minister Plenipotenciario Interino Robert Candelaria y director Erwin Arkenbout, a enfatisa e importancia di tin bon relacion entre e paisnan, entre e institucionnan y entre e funcionarionan publico.

Indudablemente e dia ameno aki lo haya un follow-up, cu seguramente lo conta cu e mesun entusiasmo y espirito deportivo. Pa circumstancianan externo, e Gabinete di Sint Maarten lamentablemente mester a cancela su participacion na ultimo momento.