Un detencion prolonga y un laga liber den caso malversacion ekipo di gobierno

ORANJESTAD – Huez comisario a prolonga detencion di un di e tres personanan sospecha di malversacion di ekipo audiovisual di gobierno, y a laga uno den libertad. No ta conoci con a para cu e di tres persona. Esun cu a keda den libertad ta Luigi A. P, mientras esun cu si ta keda cera, ta Marko E. NoticiaCla a compronde mientrastanto cu a haci un huiszoeking diabierna atardi na cas di mayornan di Marko y a bay cu un computer eynan. Mientrastanto Marko a busca asistencia di abogado Chris Lejuez pa atende su caso p'e.

E CASO

Manera cu e portal aki a raporta caba, te cu awe mainta tabatin tres detencion den e caso di ekipo di gobierno cu a ‘disparce’, manera cu NoticiaCla a raporta ayera nochi. Segun vocero di ministerio publico, Ann Angela, ta trata di no solamente Marko E, sino tambe Luigi P, y un di tres persona inicial G. E prome dosnan ta deteni for di diaranson, mientras cu Marko E. a keda deteni ayera nochi na su cas, y tur tres ta cera cu acusacion di malversacion. Angela ta confirma cu na su detencion, a tuma e cosnan (ekiponan) den beslag cerca dje y e otronan.

INVESTIGACION “E investigacion ta andando, y ta wordo hiba, manera tur otro investigacion, na un manera cuidadoso, independiente y neutral pa asina haya sa exactamente kico a pasa, kico ta e caso y kico ta berdad” Angela a sigui bisa.

PROME MINISTER

Manera e portal aki a raporta ayera nochi laat caba, a ricibi un reaccion breve di Prome Minister Evelyn Wever cu a confirma cu gobierno a duna keho y cu awor e prome detencion a cay. “Nos a laga haci investigacion administrativo cu tur e recibonan cu gabinete Mike Eman a cumpra na material y ekipo y nos a entrega keho,” Wever a bisa e portal aki awe nochi laat. Ta referina e materialnan cu lo a disparce, despues cu tabatin cambio di gobierno.

EKIPO

Segun Wever, “ta ampliamente conoci, cu nos falta hopi ekipo den bestuurskantoor. E equiponan mas obvio cu a horta, ta audiovisual. Tur miembro di prensa semper a mira e aparatonan sofistica cu gobierno di AVP tabata tin. Awor prensa por a mira tambe cu e ekipo cu gobierno nobo tin, ta di calidad inferior” Wever a cuminsa na bisa. “Den conferencia di prensa, e ministernan a menciona esaki na mas cu un ocasion. E miembronan di prensa a cuminsa cuestiona”. Basa riba esaki, gobierno a haci e investigacion cu e resultado conoci. “E resto ta den man di husticia. Y aparentemente e prome detencion a cay. Investigacion ta andando ainda. Ta hopi ekipo a ‘somenta’ ” Wever a continua bisando. Y segun e prome mandatario, mester recupera e ekiponan, pasobra nan ta cumpra cu placa di pueblo.

TRASPASO

For di comienzo di e gabinete nobo, tin informacion cu e traspaso lo a bay malo. Informacion cu e portal aki tin ta mustra cu tin varios ‘version’. Entre nan, cu e lugar a keda na ‘werki’, mientras cu di ex miembronan di gabinete anterior, nan a sigura e portal aki, cu tur cos a bay nechi y cu excepcion di 2 minister di e gabinete nobo, tur otro a haya un traspaso nechi. Pa loke ta e equiponan di oficina, a informa e portal aki tambe, cu a dicidi di registra tur cos y hinca nan den e sala ‘bieu’ di conseho di minister den e parti ‘bieu di Bestuurskantoor, pa tin un solo area, unda cu tur e ekiponan ta registra, esta computer y otro atributo. Pues cu ningun momento por papia cu e cosnan a ‘disparce’. Pero di parti di e gabinete nobo, ta mustra un otro storia, y cu nada no 'tey, y cu si nan t'ey mes, nan no tabata funciona. Investigacion awor lo tin cu determina kico tur a sosode y ken tur ta responsabel pa loke ta acusando y pa cual awor, a entrega keho. Potret ta di e ekiponan cu a keda atras, ora cu gobierno nobo a sinta.