Detencion pa posibel robo di ekipo visual di gobierno

SAN NICOLAS – Un ex trahado di departamento di prensa di gobierno anterior a keda deteni awenochi, acusa di robo di ekipo audio visual. Ta trata di e conocido persona Marko E. cu a keda deteni riba orden di fiscal. Un reaccion breve di Prome Minister Evelyn Wever na NoticiaCla awe nochi laat ta confirma cu gobierno a duna keho y cu awor e prome detencion a cay. “Nos a laga haci investigacion administrativo cu tur e recibonan cu gabinete Mike Eman a cumpra na material y ekipo y nos a entrega keho,” Wever a bisa e portal aki awe nochi laat. Ta referi na e materialnan cu lo a disparce, despues cu tabatin cambio di gobierno.

EKIPO

Segun Wever, “ta ampliamente conoci, cu nos falta hopi ekipo den bestuurskantoor. E ekiponan mas obvio cu a horta, ta audiovisual. Tur miembro di prensa semper a mira e aparatonan sofistica cu gobierno di AVP tabata tin. Awor prensa por a mira tambe cu e ekipo cu gobierno nobo tin, ta di calidad inferior” Wever a cuminsa na bisa. “Den conferencia di prensa, e ministernan a menciona esaki na mas cu un ocasion. E miembronan di prensa a cuminsa cuestiona”. Basa riba esaki, gobierno a haci e investigacion cu e resultado conoci. “E resto ta den man di husticia. Y aparentemente e prome detencion a cay. Investigacion ta andando ainda. Ta hopi ekipo a ‘somenta’ ” Wever a continua bisando. Y segun e prome mandatario, mester recupera e ekiponan, pasobra nan ta cumpra cu placa di pueblo.

DETENCION

Pa loke ta e detencion, e portal 24ora awe nochi ta raporta cu den e oranan di anochi a encarcela e persona y a hib’e Warda di Polis na San Nicolas. Tambe su famia a busca abogado caba pa bringa e caso, cu nan ta considera como persecusion politico contra di e persona.

TRASPASO

For di comienzo di e gabinete nobo, tin informacion cu e traspaso lo a bay malo. Informacion cu e portal aki tin ta mustra cu tin varios ‘version’. Entre nan, cu e lugar a keda na ‘werki’, mientras cu di ex miembronan di gabinete anterior, nan a sigura e portal aki, cu tur cos a bay nechi y cu excepcion di 2 minister di e gabinete nobo, tur otro a haya un traspaso nechi. Pa loke ta e ekiponan di oficina, a informa e portal aki tambe, cu a dicidi di registra tur cos y hinca nan den e sala ‘bieu’ di conseho di minister den e parti ‘bieu di Bestuurskantoor, pa tin un solo area, unda cu tur e ekiponan ta registra, esta computer y otro atributo. Pues cu ningun momento por papia cu e cosnan a ‘disparce’. Pero di parti di e gabinete nobo, ta mustra un otro storia, y cu nada no t'ey, y cu si nan t'ey mes, nan no tabata funciona. Investigacion awor lo tin cu determina kico tur a sosode y ken tur ta responsabel pa loke ta acusando y pa cual awor, a entrega keho.