Señora Husticia a lusa e plaza di Husticia

ORANJESTAD – Despues cu e la keda devela algun ora prome, (den dia) dialuna anochi, e estatua di señora husticia a luci cu elegancia. Un estatua cu a dura un aña y mei pa keda cla, a keda inaugura dialuna mainta riba e plaza dilanti Corte di Husticia. ‘Señora Husticia” a keda devela, cu tur su grandesa cu e simbolo aki ta representa den e mundo di husticia. E creador di e obra aki, conocido escultor local Ciro Abath, a mustra cu e tabata hopi trabou, pero e producto final ta un obra mahestral.

E mester a tene cuenta cu hopi faceta historico, y a logra incorpora tur den e estatua aki. Fabrica completamente na Hulanda, Abath a sigura cu e ta un simbolo internacional, cu un tinte local. Loke tabata un sorpresa, tabata e efecto di anochi, ora cu a bin sali na cla cu e ‘lapi’ cu ta tapa e wowo di dama husticia, ta completamente na luz anochi. Un toke sigur diferente.

E architect responsabel pa tanto e edificio como e plaza, Daphne Every, a mustra cu a tene cuenta cu tur aspecto di e estatua, ora cu a diseña e loke tabata antes Plaza Alameda. Usando e tres elementonan, manera e balansa, e obelisk y e spada, tur ta refleha bek riba e plaza. A uza e obelisk mey mey, y incorpora e otro elementonan rond di dje.

Cu excepcion di un palo, a laga tur intacto pa asina no daña e forma original di e plaza. Mes momento sinembargo, segun Every, a opta pa alarga e plaza na e nivel di e parti original, y extende esaki te na e entrada di e edificio dilanti. Cu esey , mester a kita e lugar di parkeer dilanti. Na tur, e combinacion di e plaza, e edificio y e estatua, ta sigur refleha un modernismo, combina cu un historia (e edificio di corte ta un monumento) cu Aruba a sa di salvaguardia. Foto di Senjora Husticia anochi, ta cortesia Ciro Abath.