Bikker: Otro siman tin decision riba futuro di korpschef

ORANJESTAD – Otro siman tin claridad riba e posicion di ‘korpschef’, esta Dolfi Richardson, cu por trece claridad y trankilidad bek den e cuerpo di polis di Aruba. Asina minister di husticia Andin Bikker a bisa despues di a reuni cu e sindicato di polis SPA diahuebs merdia. Segun Bikker, sindicato a informe cu e inseguridad riba e futuro di Richardson den e cuerpo y despues cu e bandona cuerpo, ta parti grandi di e problemanan den cuerpo actualmente. E no ta dunando e cuerpo e atencion mereci, y esey ta un problema segun e sindicato. Como tal a informa cu pa otro siman lo tin un decision, cu asina por enfoca riba e otro temanan y trece trankilidad bek den cuerpo.

FUTURO

Manera ta conoci recientemente Richardson a informa cu e ta bandona cuerpo y posiblemente maneha un departamento estilo interpol y combatimento di terorismo, for di Aruba. Esey kiermen cu e no ta keda den cuerpo y obviamente no como korpschef. Sinembargo segun Bikker a confirma awe tardi, cu nada no a keda regla p'e soficialmente y ta mas bien un decision tuma den conseho di minister di gobierno anterior dia 5 di september a toca e tema, pero no a concretisa nada formalmente. Pues no tin ningun instancia of departamento sigura cu Richardson por bay maneha 'ainda'. Esey ta nifica cu e asunto di futuro di Richardson ta hopi prematuro y no sigur. Como tal e ta crea mas incertidumbre pa tanto Richardson y e cuerpo.

ATENCION

E sindicato a mustra cu nan ta preocupa cu e atencion di Richardson no ta na cuerpo mas manera e mester ta, sino na su futuro plannan y esey ta haci e trabou y atencion pa KPA dificil. E sindicato a splica e mandatario cu e cuerpo asina ta demotiva, y no kier pa tin mas ‘falta di atencion’ na e cuerpo door di e korpschef. Hunto cu e falta di atencion, tin falta di material y mas cos. P'esey Bikker, mirando e situacion, a dicidi e ora pa den un periodo hopi cortico, bin cu un decision pa e asunto di korpschef otro siman pa asina tin un claridad y trece e confianza bek den cuerpo y pa tur hende sa unda nan ta para. Kico esey ta nifica, Bikker no kier a adelanta, y a mustra cu e lo divulga esey na su debido tempo.