Segun SMOA ‘garantia’ di minister pa cu diploma, no ta sigura

ORANJESTAD – NoticiaCla.com a compronde di su fuentenan yega na SMOA (Stichting Middelbaar Onderwijs Aruba), cu no obstante e hecho cu minister di enseñansa a bisa dialuna, cu tin garantia cu e diplomanan ta sigura, cu SMOA ainda tin su duda. Y cu e asunto no ta completamente manera cu e mandatario ta bisa.  

E minister a reacciona dialunariba e articulo di diadomingo cu NoticiaCla.com a publica basa riba informacion di corespondencia entre e mandatario y SMOA cu ta mustra su precupacion pa cu e situacion actual. Segun SMOA, (den e articulo di NoticiaCla.com)  un total di entre 1600 pa 1800 studiante di Aruba por confronta problemanan serio aki un par di aña ora cu nan termina nan enseñansa avansa (havo/vwo) na Aruba. Esaki pasobra nan diploma ( di esnan cu caba havo /vwo na Colegio Arubano)lo no tin balor pa por continua estudio na Hulanda, manera cu e situacion ta aworaki. Cartanan di Hunta di supervision di SMOA (Stichting Middelbaar Onderwijs Aruba) cu ta maneha Colegio Arubano y cu NoticiaCla.com a pone su man ariba den fin di siman, a mustra cu nan ta hopi precupa cu si no actua awor, e problema lo bira uno real, cu tur su consecuencianan.

Pa ilustra esaki miho awe, NoticiaCla.com ta publica parti di e corespondencia. Entre nan e corespondencia cu e minister, unda cu SMOA ta acepta cu algun punto cu e minister ta ‘trahando ariba’, no ta completamente cla. Y esnan cu no ta cla, por crea problema manera un carta cu SMOA a manda pa minister, fecha dia 16 di september ultimo (lesa carta aki). Tambe tin e falta di reaccion di minister (a duna dos siman di tempo) riba carta cu abogado di SMOA a manda pa e asunto di instroom di MAVO, unda cu SMOA a contesta e carta ariba menciona (lesa e carta aki). Aki e abogado ta splica tur consecuencia cu esaki por tin.Un otro prueba segun SMOA cu pa lunanan largo, no tabatin comunicacion entre e fundacion y minister encarga.  Como tal, NoticiaCla.com a compronde cu e problema no ta resolvi y cu tin un impasse ainda entre e mandatario y e fundacion.