Wever: Rutte ta duna Aruba espacio pa atende cu reto financiero

ORANJESTAD – Aruba ta haya espacio pa atende cu e reto di e situacion financiero di Aruba, sino cu e ta trece un peso adicional pa comunidad. Asina prome minister di Aruba Evelyn Wever Croes a informa di su prome teleconference cu colega minister Hulandes Mark Rutte diaranzon mainta. Detayes sinembargo di kico exactamente tin cu compronde cu 'espacio', no a wordo duna. Ta conoci cu pa 15 di december Aruba mester entrega su presupuesto financiero na CAFt pa supervision, sino ta violando e ley di LAft, cu consecuencia cu Aruba por haya un KB. Den pasado caba sinembargo, incumplimento di e gobierno anterior pa entrega e presupuesto na tempo no a conduci den un KB, y awor ta premira mescos. Varios otro tema a keda trata, manera e traspaso cu no a bay mucho ordena, segun e prome mandatario aunke a sigura cu esaki no a stroba e trabaonan di e gobierno nobo.

FINANZAS

A informa e prome mandatario Hulandes cu Aruba mes ta trahando riba un plan financiero pa pone e isla riba e rumbo corecto. Segun Wever, Rutte a aprecia esaki cu e isla mes a tuma e iniciativa. Wever a bisa cu unabez cu tin tur cos cla, lo kier reuni cu gobierno Hulandes den un forma mas formal pa asina tin palabracion concreto con pa sigui dilanti cu e situacion financiero di Aruba.