BCA: Confianza di consumidor miho, pero ainda pesimista

ORANJESTAD - Sentimento di e consumidor a mehora un poco den e di tres trimester di 2017, segun e ultimo resultadonan di e Encuesta di Confiansa di Consumidor (CCS) di Banco Central di Aruba (BCA). E Indice di Confiansa di Consumidor a cera na 95,6 compara cu 94,4 den e trimester anterior, indicando sinembargo ainda e sentimentonan relativamente pesimista.

POSITIVO

A pesar di e sentimentonan negativo en general, e consumidornan tabata positivo riba nan situacion financiero personal, cu un indice cu a yega na 102,2, esta relativamente optimista. E consumidornan tabata mustra hopi mas confianza riba nan situacion financiero pa futuro (102,7). Sinembargo, mayoria di e otro componentenan di e situacion actual di e consumidor tabatin resultado mas pesimista, compara cu e encuesta anterior, causando un bahada den e Indice di Situacion Actual for di 95,5 te na 94,8

EXPECTATIVA

E expectativanan di e consumidor a subi di 94,7 pa 97,3, causa pa gran parti pa un sentimento positivo riba e situacion financiero personal pa futuro, cual a mitiga pa e expectativanan di trabou y tambe e posicion financiero di gobierno.

INDICE

E Indice di Habito di Consumo a mehora un poco den e trimester bou di revision. Esaki ta debi na e sentimentonan positivo relaciona cu baymento cu vakantie . Sinembargo, e mayoria di consumidornan a indica cu no tabata apropia pa cumpra un auto (60,4 porciento), ni pa haci un prestamo (70,0 porciento) of tuma un hipoteca (74,0 porciento). E gran mayoria di respondientenan (63,1 percent) ta anticipa cu e prijsnan lo subi den e siguiente 6 luna, resultando na un Indice di Expectativa di Prijs di 90,9.

CONFIANSA

Resumiendo, e mehoracion den confianza di consumidor ta atribui principalmente na e sentimentonan positivo di e consumidornan relacta na nan situacion financiero personal actual y pa futuro y e sentimentonan rond di vakantie.