Rafael-Croes: 80% di violacion sexual di mucha na Aruba ta di incest

ORANJESTAD – Un 80% di e casonan di violacion sexual na Aruba ta sosode como incest. Asina pediatra Louise Rafael Croes a confirma den e programa NoticiaCla LIVE dialuna. Di cada 10 caso confirma di abuso sexual, 8 caso ta pa medio di un familiar, manera tata, omo of otro familiar, cu ta cay bou di incest. E ta un situacion hopi alarmante segun Rafael, y e mas pio ta, cu segun Rafael esaki no ta sorprende, pasobra ta cos cu ta sosode casi tur dia.

SHOCK

Mientras cu Rafael ta shocked, cu atrobe un caso di abuso di mucha a tuma lugar, e no ta geshocked cu e caso a tuma lugar, papiando di e caso Speeltuin, unda cu dos criatura di 3 y 5 aña ta fayece a consecuencia di violencia domestico. Rafael a recorda cu ta no mas cu 2 aña pasa un criatura di 11 luna a fayece, ora cu su tata a maltrat'e severamente te mat'e. Tambe tin e caso di 4 aña pasa, ora cu un mucha muher di 3 aña a fayece na man di su tata cu a maltrat'e severamente. Pues no ta e prome caso y ni e ultimo. Loke a pasa awor ta, cu simplemente e casonan ta mas publico, ya cu hende ta meld nan mas.

REGISTRO

Recientemente un parlamentario a trece dilanti cu no menos cu 32 caso di abuso di mucho a keda raporta den a penas un siman. Cifra cu Rafael a confirma tambe den e programa dialuna. “Na 2016 a raporta 175 caso di abuso di mucha, cu ta traduci den 1 caso cada dos dia” Rafael a bisa. Pues e aña aki e cifra a aumenta drasticamente. Y for di e aña cu Rafael a cuminsa registra esaki na 2012, e cifranan a sigui aumenta. Na 2012 a registra 50, na 2013 70, 2014 100, 2015 120 y na 2016 175. A mustra cu practicamente tur dia tin caso di abuso di mucha.