Arends: Sorprendi cu gobierno nobo no por cumpli cu norma

ORANJESTAD – Ex Minister di Economia Richard Arends a keda sorprendi cu e declaracion di actual Minister, cu tin e cartera ey, Xiomara Ruiz, riba e situacion financiero di pais Aruba. Asina el a bisa den conferencia di prensa di e partido berde diamars mainta. Particularmente e asunto cu Aruba no por cumpli cu norma di Caft pa 2017 y 2018. Segun Arends, e no ta compronde con e gobierno aki no por logra loke AVP si a logra tur e tempo aki y sigur for di 2014.

PRESUPUESTO

E otro sorpresa pa Arends, ta pa tende di e Minister nobo, cu no tin presupuesto, siendo cu algun siman pasa a entrega un presupuesto supletorio y un presupuesto den liña grandi pa 2018. Y e presupuesto segun Arends, sigur ta cumpli.

E DEBENAN

Den caso di e debenan cu a keda menciona di, entre otro 130 miyon cu falta pa drenta ainda, Arends a clarifica esaki tambe. Ruiz a menciona un dia prome cu di e 130 miyon florin, 50 miyon ta na winst belasting, 7 miyon na inkomstenbelasting y 73 miyon na loke Valero debe gobierno ainda. Pero segun Arends, tur tin un splicacion. Segun e ex mandatario di economia, e deadline pa placa di winstbelasting drenta, ta 30 di november, pues e placa ey mester a drenta. Mescos ta conta pa inkomstenbelasting. Pa loke ta Valero, tin un acuerdo cu prome cu fin di aña e suma ey tambe mester drenta. Ademas e aña financiero di nan ta cera na maart di otro aña, pues tin un espacio ainda pa cumpli cu esaki. Pues Arends ta cuestiona seriamente e declaracionnan di e mandatario di economia y finanza. Segun Arends, ta netamente cu esaki a core campaña y cu tabatin un plan. Diripiente gobierno no tin un plan financiero. E ta hay'e algo serio y cu no por haci politica cu ne. E ex mandatario ta spera cu e declaracionnan aki no ta e base pa nan goberna, mirando cu e situacion ta otro di loke cu e mandatario nobo a informa un dia prome.