Oduber: A pidi conseho riba desaroyo dilanti Divi y Eagle Beach

ORANJESTAD – Minister di Infrastructura Otmar Oduber a pidi conseho riba desaroyo dilanti Divi y Eagle Beach, particularmente e terenonan den discusion actualmente. Asina e mandatario su ministerio a laga sa pa medio di un comunicado dialuna atardi. E comunicado ta papia di un encuentro cu e team di maneho di DIP, ora cu Oduber a pidi informacion pa loke ta trata e terenonan cu ta hopi den discusion den e ultimo dianan, esta e tereno dilanti di e hotel Divi y e tereno na Eagle Beach.

TERENO

Den caso di tereno, ta papia specifico di e tereno dilanti di Divi Resort, unda cu por a mira midimento cu a tuma luga pa un tereno cu tin casi 40% di dje den ‘groen gebied’ esta, area destina pa keda naturaleza. “Mi a pidi conseho riba esaki pa haya mas informacion, a pesar di cu tin un acuerdo firma caba door di e Minister di Infrastructura anterior” e mandatario a sigui bisa.

BERDE

E terenonan cu ta den ‘groengebied’, definitivamente mester pidi p’e consehonan necesario di DOW y di DNM, prome cu continua cu e procesonan riba e terenonan aki. Mescos a mira e discusion riba un tereno na Eagle Beach, unda cu un NV a hacie peticion pa un propiedad pa un hotel cu kier construi di 800 camber.

Oduber ta sigui splica cu, buscando mas informacion, a compronde cu nan tambe a haya un acuerdo di Minister di Infrastructura anterior ya firma.

MANEHO

Gobierno tin un maneho pa loke ta ‘algemeen belang’, y e terenonan cu ta den ‘groengebied’ ta di interes pa preservacion di nos mangrovenan. P'esey den ambos caso a pidi conseho adicional pa por haya un bista mas cla riba e discusion cu tin riba e terenonan. Potret cortesia ABC.