Mando policial ta reacciona e siman aki riba manifestacion di diabierna

ORANJESTAD - ‘ Mando policial ta evaluando e manifestacion di diabierna ultimo y mas tarda diaranson lo bin un reaccion di parti di Mando Policial’. Esaki ta e reaccion oficial di mando policial emiti dialuna basa riba e manifestacion. For di momento cu e manifestacion a tuma lugar, y a bira uno bastante problematico, mando policial (di parti di esnan di e manifestacion) a haya basta critica di nan forma di actua. Entre otro, e hecho cu a uza Mobiele Eenheid (Riot Commando den boca di pueblo) y e cachonan di polis (K9 unit), tabata topico di combersacion den fin di siman pasa.

Segun e reaccion oficial di cuerpo policial, ‘e hecho cu Cuerpo Policial Aruba a honra practicamente tur peticion pa manifestacion of protesta, ta muestra cu e organisacion policial ta sostene tur grupo den comunidad cu kier protesta riba un of otro tema’. Segun cuerpo policial, ‘ e ta parti di e derecho constitucional di cada ciudadano, pues pa por tin libertad di expresa nan opinion y demostra nan malcontento’

A splica tambe cu na momento cu un grupo haci peticion oficial na Cuerpo Policial Aruba pa un manifestacion, ta otorga nan esaki, semper y cuando mara na condicionnan den cuadro di orden publico. Mas informacion no a wordo duna, sino solamente cu mas tarda, diaranson awor ta bin cu e declaracion y reaccion oficial riba e manifestacion.