Wever a pidi Knops espacio pa Aruba su situacion financiero

ORANJESTAD – E siman aki prome minister Evelyn Wever Croes ta papia cu prome minister Mark Rutte, y lo toca e tema di finanza di Aruba. Asina Wever Croes a declara durante conferencia di prensa dialuna mainta. Ademas Wever a confirma cu secretario di estado Hulandes pa Asuntonan di Reino Raymond Knops riba e tema y cu a pidie pa duna Aruba espacio pa gobierno por bin cu un plan ‘aceptable’ pa regla e asuntonan di pago.

RUTTE

E mandatario a mustra tambe cu e lo reuni cu Rutte e siman aki, pero sin e necesidad pa bay Hulanda pa haci tal. E no a bisa con e lo haci esaki pero ta mas sigur sea un yamada di telefon of tele conferencia. E ta algo normal cu mandatarionan ta haci ora di reuni cu otro durante conferencia, ora cu nan no ta riba e mesun destinacion. Segun Wever, esaki ta mustra cu no mester core subi avion cada bez manera cu gobierno anterior tabata haci, pa reuni cu gobierno Hulandes.

TEMA

Pa loke ta e tema, e mandatario a bisa cu mientras cu e tema ta finanzas, e no tin garantia cu Hulanda lo bay completamente di acuerdo cu gobierno di Aruba pa loke ta un ‘tempo extra’ pa Aruba ‘regla’ su asuntonan financiero. Pero e no a haya un ‘no’ ainda. Loke kier di Hulanda ta cooperacion pa por resolve e problema hunto, indicando cu e situacion ta di tal indole cu den proporcion, ni un pais grandi poderoso no por regla un asunto asina su so.

MEDIDA

Loke tambe Wever a bisa ta cu no ta asina cu automaticamente ta implementa un tipo di medida riba e lomba di pueblo. Lo busca formanan alternativa pa sali di e problema cu tin, pero no necesariamente den forma di medida. Den pasado e partido heel a wordo tilda di ta e ‘partido di medida’, y esey tabata un di e aclamacion semper di partido AVP, cu nan si por resolve e problemanan financiero sin medida. Como tal Wever tin e reto ey awor pa tambe resolve e situacion, sin bin cu medida extra. Mientras cu e mandatario a bisa no ta den forma di medida, e no a bisa si, con otro e tin pensa di resolve e asunto aki, pero si a bisa cu e ta un ‘reto enorme’. Ta papia di tapa un buraco di 100 miyon pa 2017 y 200 miyon pa 2018.